Wednesday, December 28, 2011

聖誕節系列之七:有冇聖誕老人?

網上同其他媽咪傾計,原來而家有好多小朋友細細個已經唔信有聖誕老人,四歲人仔話聖誕老人係嗲地媽咪,聖誕老人係商品......嘩,而家小朋友真早熟(唔好聽係老積),對於童話故事只當笑話聽。

我家少爺小姐或者係比較純(或者係鈍),佢地對聖誕老人嘅傳說深信不疑,而且有好多精彩演譯,從未想過兒童世界會這麼細緻又有童真。




哥哥時常搗蛋,又會同妹妹爭玩具,由於聖誕節臨近,他知道聖誕老人會送禮物給乖小朋友,如果百厭,聖誕老人就唔會俾聖誕禮物,佢一直想有架monster truck(或者其實係點樣都冇咩關係),好早前已經問我地可唔可以買俾佢,日日放學行過間舖頭都同婆婆講,叫婆婆同我講買俾佢,因為仔仔喺學校有社交行為問題,我同李生決定如果仔仔可以喺學校乖乖地,我地會買俾佢,同仔仔約定咗,老師又幫手,做得好果日就有一張good ticket,幾個星期下來,仔仔攞咗13張good tickets,班主任亦都講仔仔真係做得好好,佢都好開心。

仔仔睇中果monster truck要US$88加稅,真係好貴,到咗聖誕節前處處都減價,有個星期日見到Target leaflet有架類似但細架D嘅RC car減到US$24.99,於是我就去買咗兩架,一架俾仔仔,一架俾老公個姨甥仔。架車一直放喺仔仔見唔到嘅地方。 

直到12月23日晚,我要去攞少少嘢,帶埋兩兄妹去,我唔記得咗架車同買俾個女嘅聖誕禮物放咗喺果度,哥哥好眼利見到就開心到顛咗,
哥哥問我:係咪我架,可唔可以拆?
我話:唔知,係聖誕老人放喺度,但係唔知聖誕老人係咪俾你,因為你呢幾日唔乖。
哥哥:我會乖架,你同聖誕老人講啦,我想要架truck。
我:OK,等我睇吓你乖唔乖先決定。


去到平安夜下午,哥哥突然同我講:媽咪,你有冇聖誕老人個電話? 
我:做咩呀?
哥哥:你有冇呀?
我:咁你想做咩先?
哥哥:Can you call Santa, tell him I want the truck?
我:聖誕老人好忙喎,我都冇佢電話。 
哥哥:你有架,你打俾佢啦,我會乖啦。 


之後佢唔知喺邊度搵到一隻細細隻嘅聖誕襪,
佢好開心話俾我知:媽咪,我搵到隻Christmas sock,聖誕老人可以派禮物俾我。不過,架truck放唔落喎。
我答:It's OK,放唔落聖誕老人會放禮物喺你床邊架啦。
去到夜晚9點,哥哥同豬扒妹仲未捨得瞓, 

我話:如果唔去瞓,聖誕老人唔會嚟架,你地要瞓咗佢至會嚟派禮物。
豬扒妹即刻彈起身:OK,我去瞓啦。即時走去擦牙去廁所上床瞓。 
哥哥都行去擦牙去廁所
,佢問我:媽咪,你打咗俾聖誕老人未呀?我想要果架truck。


第二朝,豬扒妹一早起身跟咗李生去洗衫同groceries shopping,哥哥同李太瞓到8點幾至起身。
哥哥坐喺床度同我講:Mommy, Santa hasn't come...
我:你點知聖誕老人冇嚟?
哥哥:佢冇呀,I have not heard him say HO HO HO
我:你瞓著咗點聽到呀?
哥哥:我會聽到架,聖誕老人冇俾禮物我。
我:聖誕老人有放低禮物,佢俾咗媽咪啦,不過要今晚去爺爺度食完飯至拆得。
哥哥:咁喺邊度呀?
我:你遲D就知架啦。


聖誕夜成餐飯,哥哥都問我拆得禮物未,因為李太包好花紙,哥哥睇唔到架RC Jeep,到我俾個禮物佢果陣,佢見到咁大份好開心,一見到係架truck(佢叫truck)就即時想玩,開心到拎住周圍同人講he got a truck from Santa。

一個5歲小朋友相信聖誕老人,仲可以將咁多細節理性咁串連起嚟,李太真係好意外,哥哥同李太嘅對話之後有講番俾李生聽,李生一邊揸車一邊會心微笑。李太在FB同親友分享,大家反應都係好正面,難得哥哥還有童真。

後記: 


Boxing Day哥哥問李太:媽咪,架truck係你買架?
我:唔係,係聖誕老人送架。
哥哥:No,聖誕老人唔知我想要架truck,係你買架。
我:No,聖誕老人知道個個小朋友鍾意D咩架,佢有張list,有晒個個小朋友嘅名同想要咩禮物,乖小朋友至有禮物,唔乖就冇架啦。
哥哥:Oh,但聖誕老人冇收到我畫俾佢張畫喎。
我:佢唔得咗拎,唔緊要啦,下次你再俾佢啦。

9 comments:

  1. 渡鹰河 Yahoo 香港December 30, 2011 at 5:51 AM

    這個 blog 很有意思。
    [渡鹰河 Yahoo 香港回覆12/31/2011 02:46:56]^^
    [版主回覆12/31/2011 02:41:49]謝謝,只是把小兒的有趣說話「紀錄在案」,小女有關聖誕老人的對話都會稍後整理後寫成另一篇。

    ReplyDelete
  2. .♥.✰.'*•.*░ H░A░P░P░Y░░░2░0░1░2░ღ .*•*♥*•✰
    [版主回覆12/31/2011 14:08:27]Happy New Year to you too.

    ReplyDelete
  3. wow! Happy New Year!
    [版主回覆01/01/2012 07:14:37]Happy New Year to you too.

    ReplyDelete
  4. 過多兩年額佢唔到囉。^^
    [版主回覆01/02/2012 16:35:25]係呀,過兩年佢地自己會明,不過我有朋友個仔4歲已經唔信。

    ReplyDelete
  5. ♥.✰.'*•.*░ H░A░P░P░Y░░░2░0░1░2░ღ .*•*♥*•✰

    得閒上去我舖頭睇睇
    http://www.comingzoo.com/

    ReplyDelete
  6. 恭祝您新年快樂,,身體健康,,笑口常開樂融融,,,^_^
    [版主回覆01/04/2012 17:03:35]Yu Sir, 新年快樂,最緊要身體健康。

    ReplyDelete
  7. 原來美國都有target,我以為係澳洲local既shop,我想問,美國有冇k-mart.......??
    但係你仔仔咁乖,點解你唔買$us 88果架比佢,因為我覺得,錢唔係一個問題,
    係因為你仔仔好想要果架車車,所以好乖好乖,心底入面有一個聖誕禮物既期望,
    我覺得一個小朋友得到佢真係恨左好耐既玩具,果種實現願望既心係好可愛純真.....
    可能對個小朋友黎講,架架車都係差唔多,平平地都係咁玩,但係如果真係得到自己最想要果架,
    係真係會珍惜好多.......而且係,你應承左佢,佢乖佢買佢想要既野比佢~
    我仲讀緊uni,未做人媽媽,不過我諗如果聖誕節咁難得,我會買貴少少比仔仔
    不過,我真係好鍾意你仔仔!!!!!我覺得佢真係好可愛
    其實,係我好細個果陣(比你仔仔更細個),已經知道有聖誕老人,
    同埋知道聖誕老人係人扮,唔會存在!!!!
    就算屋企人唔講,淨係通過電視同埋其他野,小朋友真係冇純真
    因此我好鍾意仔仔>.<"其實係咪外國既小朋友單純d??
    因為澳洲既小朋友都信有santa架,仲信到十足十!!!!!
    [版主回覆01/05/2012 14:15:46]美國呢邊小朋友大多比較純,我朋友住澳洲,對仔女都係,可能係呢邊室外活動較多,睇電視時間少,冇咁多耳濡目染,我反而覺得咁樣可愛D,唔駛咁快要做老人精。
    [版主回覆01/05/2012 14:15:45]美國呢邊小朋友大多比較純,我朋友住澳洲,對仔女都係,可能係呢邊室外活動較多,睇電視時間少,冇咁多耳濡目染,我反而覺得咁樣可愛D,唔駛咁快要做老人精。
    [版主回覆01/05/2012 05:55:51]呢度有KMart,不過過去一年業積唔好,今年要關好多間,我好少去KMart買嘢,而家美國經濟唔好,買嘢都要諗過度過。多謝你鍾意仔仔,其實我同李生有去睇過架$88車,李生亦都話買,不過再望清楚,覺得架車粗糙咗少少,唔值咁嘅價錢,想再搵吓有冇好D嘅,所以冇買到,後來間舖頭賣晒,仔仔冇再見到架車,咁啱Target減價,我俾仔仔望過張相,佢話鍾意,於是就即刻去買,以免又賣晒。你都講得啱嘅,仔仔努力想要果架車,係佢嘅目標。不過小朋友太善變,而家仔仔想要相機,好彩我聖誕節時已經買咗一部,等佢生日時送俾佢。

    ReplyDelete
  8. 我兩個囝囝都一直相信有聖誕老人的存在, 但今年起, 我地同佢講出真相, 因為:

    1. 唔想佢大個知道事實後, 覺得 daddy 媽咪呃佢. 令佢對我地失去信心
    2. 我地有宗教信仰, 唔想佢地第二時知道我地呃佢有聖誕老人時, 以為我地呃佢呢個世界有神

    幸好過程順利~ 將來可以用自己的名義, 送禮比囝囝
    [版主回覆01/05/2012 14:11:24]我地冇刻意要對仔女信或唔信,只係學校老師講故事有聖誕老人,而對仔女睇嘅都係小朋友電視節目,一般都較為有教育意味,自然對仔女冇懷疑係假嘅,暫時佢地都仲細,仲未識分真假,有時睇到電影或卡通某D情節會嚇怕佢地,我地反而要講解,美國呢邊小朋友一般都較純,就俾我對仔女信多一兩年。你地做得好好,會講解俾兩個仔聽,總好過佢地喺不知名嘅途徑收到不正確訊息好。

    ReplyDelete
  9. 第一之黎你個blog!
    同小朋友講芬蘭有聖誕老人 等佢地儲多d錢去 唔失望又可以教佢地儲蓄習慣^^
    嘩.. 2個小朋友好似樣!!so cute!!!
    天氣好凍 小朋友要著多幾件衫 唔好凍親喔^^
    [版主回覆01/06/2012 15:56:37]嘻嘻,好提議喎,我對寶貝係鄉下仔鄉下妹,未搭過飛機未去過旅行,可能要解釋下至明,LOL。係呀,佢兩兄妹以前嘅超聲波相超級似架,而家反而好少人話佢地似樣,係成日有人話個女同我餅印咁。多謝關心,美國冬天都真係幾凍。

    ReplyDelete