再嚟燒賣：菊花燒賣 Chrysanthemum Siu Mai

再整燒賣係因為豬扒妹學校開Thanksgiving party，我地想到拎一D點心去學校俾小朋友食，原來想整埋雞翼或雞槌，但校長會拎火雞應節，所以叫李生李太只帶點心就好啦。 

 

今次整加入咗冬菇，同埋李太想包大隻少少，加多咗餡嘅如果用上次果種包法會包得唔實，隻燒賣好似肉酸咗，咁成日喺酒樓見到人地包果D，塊皮好少有厚摺紋，於是試咗幾隻後，就「發現」咗呢個包法，好好玩又好似朵花咁，因為有八九塊花瓣，我就姑且叫呢個做菊花燒賣啦，其實叫太陽花都似架，但中國點心似乎同菊花襯D。OK，ready？

材料：
半肥瘦豬肉　　　2磅
中蝦　　　　　　1磅

冬菇　　　　　　約8隻

醃料：
鹽　　　　　　　1茶匙半
生抽　　　　　　2至3湯匙
麻油　　　　　　2湯匙
胡椒粉　　　　　半茶匙（可以唔加）
蛋　　　　　　　2隻

做法：
1）半肥瘦豬肉攪碎或買免治豬肉。
2）蝦去殼拍爛或切細粒加入豬肉中，放入鹽、生抽、麻油、胡椒粉拌勻。

3）冬菇以少少熱水浸軟，瀝乾水份，切成細粒，拌入肉中。

4）餡料嘅肉加入全蛋兩隻拌勻，可以開始包燒賣啦。

5）放入約一湯匙餡料於燒賣皮中間，由一個位置開始，以手指將皮擠出一塊塊花瓣型態。

千萬不可以心急，由一點開始續少續少包，完成時塊皮應該有8-10個接觸點同餡料相貼，就好似一朵菊花咁。

6）蒸籠掃少少油，放入燒賣蒸8-10分鐘，蒸好時個燒賣仲見到有肉汁，襯熱由蒸籠中取出放碟中。

 

呢個係第一籠完成品。

第二籠完成啦。

最後第三籠，總共60隻燒賣。

睇到D肉汁嗎？超正呀。

李太一邊包一邊蒸，可能太過慢工出細貨，包總係趕唔上個蒸籠，即係10分鐘包唔到20隻，好佩服酒樓點心師傅一日包上幾百幾千隻，呢D係要用陰力，整完兩隻手臂都有D酸。

小貼士：
1）今次因為包工唔同，唔駛好似上次咁要用蛋黃埋口，蛋黃蛋白全部加晒入去肉餡中。
2）由於今次直接放蒸籠上蒸，蒸嘅時間可以短少少。
3）燒賣放入蒸籠前，要喺個蒸籠底掃上少少油，另外要襯熱夾起，唔係凍咗就會痴住個籠底，個燒賣就甩底架啦。
4）呢個包法要靠肉餡痴住個皮，所以要加全蛋，而且整好個形之後要睇清楚肉夠唔夠多，皮同餡係咪痴得實（有八、九個接觸點），唔夠要加夠，務求蒸出嚟個燒賣唔會甩皮甩骨有「內涵」。
5）由於肉較多，要放平個燒賣，可以包完後用一隻提起個燒賣再輕輕壓番落另一隻手度，等個燒賣底係平嘅就會放得穩，唔會蒸蒸下打側漏晒D肉汁。