醋漬醃菜彩虹椒 Pickled mixed veggies & peppers

咁啱李生買咗個細細嘅紹菜（又叫黃芽白），佢叫我切嚟煲雜菜湯，我見都用唔晒，不如留D整個醃菜啦。事緣係星期四去學校活動，之後去晚飯，果間餐廳個前菜係醋漬紹菜，爽脆又合酸度，問個老闆點整，佢話只係用D醋加糖醃幾日，但我覺得應該有D秘訣，不過人家做生意，當然唔會隨便講俾人聽，我心癢想試吓整唔整到人家咁好，今次機會嚟啦，因為齋整紹菜好寡，所以就攞咗婆婆幾個彩虹椒，所謂彩虹椒係細細隻嘅顏色細椒，唔辣不特止，炒起嚟仲好甜好爽，地中海菜都成日有用到，呢排賣得好平，$0.99一大袋非常抵食，一袋食幾餐。

材料：

紹菜　　　　隨意（我呢次用咗約半個）

彩虹椒　　　隨意（我用咗7小隻）

醋　　　　　約8安士（200ml）

糖　　　　　2大湯匙

鹽　　　　　1茶匙

蒜頭　　　　2瓣（去衣略拍）

月桂葉　　　1片

玻璃樽　　　1個

做法：

1）紹菜切成細塊，彩虹椒去芓切粗絲，放滾水中略灼撈起，倒去水份。

2）醋加入糖、鹽中拌勻。

3）紹菜及彩虹椒續少夾入玻璃樽中，倒入醋溶液，加入蒜頭及月桂葉，略攪拌至蓋過所有材料。

4）由於紹菜同彩虹椒之前略煮，放入醋之後仍有餘溫，待涼後放入雪櫃中，隔晚已可以食用。

小貼士：

1）紹菜不要滾太久，否則軟晒就唔好食。

2）彩虹椒紅色較甜，黃色橙色則較淡味，可按口味加減。

3）普遍用白醋醃菜，我用嘅係蘋果醋，貪佢有一陣果香同味略甜。

4）醋要蓋過全部菜同椒，要按玻璃樽大小同材料多少加減醋嘅份量。

5）蒜頭同月桂葉為個醋汁帶來香味，另外令醋汁多一個層次嘅口味，可以唔加都得。

6）嗜辣者加入切粒紅辣椒即可。

7）醃24小時已可以食得，如果試味嫌未夠酸可再醃多一日。

今晚撈起一小碟俾李生試食，佢密密夾，我已經偷笑，即係佢鍾意啦，結果佢話真係好好食，嘻嘻。