講講感恩節之四：蘋果批上篇 - 批皮 Apple Pie - Pie Crust

蘋果批就好似火雞一樣，似乎係感恩節不可或缺嘅甜品，因為我地一家去李生表哥屋企過節，而表哥指定我地帶蘋果批做甜品，表哥嘅媽媽（即係李生姑媽）最拿手就係蘋果批，我都有幸食過一次，老人家喺4年前癌症過世，咁好嘅蘋果批就此失傳，表嫂學到姑媽另一拿手菜糯米飯，豬扒妹今日居然要再添，可想而知有幾好食。

講番整蘋果批，李生李太拍拖時第一次去李生屋企過聖誕節就係整咗個蘋果批帶去，中間咁多年我都冇正式再整過，檸檬批呀、雜果撻、芝士餅反而有整過好多次。今次呢個蘋果批係用一個傳統蘋果批食譜做嘅。先講做批皮，因為要雪最少4個小時，最好係隔夜，所以我係感恩節之前果晚搓定批皮。

材料：（做出兩塊約9吋批皮）

中筋粉　　　2杯半（20安士=565g）

鹽　　　　　半茶匙

牛油　　　　  1杯（8安士=227g）雪硬

冷水　　　　半杯(118ml)

做法：

1）麵粉篩好，混入鹽。

2）牛油最好係用之前才由雪櫃取出，切成細粒，拌入粉中，以rubbing in方法把牛油搓入粉中，完全混合成麵包糠狀。

3）混入冷水，每次加一至兩匙拌勻，直至形成粉團。

4）以保鮮紙包好，放入雪櫃中4小時至過夜。

5）撒粉於檯上，把粉團取出，一分為二，用麵粉捧碌成圓形，至少有9吋直徑大小。

6）以麵粉捧卷起麵粉皮，放9吋圓形焗批盤上，於底部及圍邊平均壓實。

 

下篇再講做蘋果批餡部份。