Friday, November 25, 2011

講講感恩節之五:蘋果批下篇 - 批餡及烘焗部份 Apple Pie - how to make filling & bake



講到個蘋果批餡料同烘焗就係成個蘋果批嘅成功關鍵,當你已經雪咗個批皮4小時以上,由雪櫃拎番出嚟,睇落去好似好硬咁,但其實唔係架,我用個切麵粉用嘅膠刀非常容易切開,切開咗個麵團兩份之後,將一份壓平放入焗盤底成為批底。

批皮做法







材料:
大蘋果   3個(約8杯份量,即約4磅)
檸檬汁   2湯匙
黃糖    1杯(8安士=227g)
麵粉      1/4杯(2安士=57g)
肉桂粉   1茶匙
荳蔻粉   1/4茶匙
牛油    1安士(28g)
蛋黃    半個

做法:


1)蘋果去皮去芯去核切片,倒入檸檬汁拌勻。我今次係先用個削皮刀去芯,然後削皮,切成一個個圓環狀薄片。








唔加檸檬汁,用少少鹽加水浸過蘋果片都可以。





2)把糖、麵粉、肉桂粉、豆蔻粉混合拌勻,加入蘋果片中略拌勻。

3)把蘋果片排入一個9吋焗批盤中,把牛油切成細粒撒入當中。







4)搓壓開第2張批皮,然後蓋上面,在批皮面上剌很多小孔,我用一個細星星曲奇模切出一個個小星星,一來望落去靚好多,另外亦有一樣的作用。以手指或叉子把批皮壓實,切去多餘批皮。



5)蛋黃放碗中點拌打,掃上批皮面。
6)以425度F(218度C)焗15分鐘,再較細至350度F(175度C)焗40至45分鐘,直至批皮轉金黃色和蘋果餡滾至起泡。








小心得:
1)蘋果可切成半圈薄片或大粒狀都可以,我切成圓圈狀係想可以食到較大塊蘋果餡。唔加檸檬汁,用少少鹽加水浸過蘋果片都可以。
2)批皮不要分成兩等份,批底一份應較大塊,因為要完全覆蓋焗盤底,而且最好可以反上嚟包住面果一塊批皮,咁就冇咁易會爆邊,流晒蘋果餡出嚟;不過如果唔太多都冇問題,因為焗完凍咗就冇事。
3)肉桂糖等可以不預先拌入蘋果餡中,而係在排蘋果入批皮中時,一層一層撒上面都可以,焗嘅過程中都會溶入餡中,只是先拌勻可以做到每一塊蘋果片都會沾滿肉桂糖。
4)豆蔻粉可以唔加都得,味道唔係差太遠。
5)原食譜係3/4杯黃糖加1/4杯白糖,但我家中已少食白糖,呢次用全黃糖,反而更香口。
6)食時切開加雪糕或雪芭同食,其味甚夾,今次嘅係三色雪芭。

後記:
李生唔記得李太以前整過蘋果批,今次感恩節大餐表哥一家指定叫我地帶蘋果批去,李生驚李太整嘅蘋果批失禮人,因為表哥媽媽(即李生姑媽)生前最拿手之一就係蘋果批,所以李生都焗咗一個朱古力榛子醬蛋糕拎去。





結果係李太冇失禮人,表哥話個批皮好香牛油味好酥,老爺仲俾面咁講咗幾次個蘋果批好好味,表嫂講笑話表哥:"Shame on your raspberry pie, compared to this apple pie. Hind your pie."表哥笑笑口話:"I bought the raspberry pie just as back up."當然我地知佢地兩個都係搞搞笑,真開心李太整嘅蘋果批有咁多人欣賞,個個食得飽飽都食得落多一塊,不到一陣個蘋果批就只淨不到1/3;大家嘻嘻哈哈食咗一個好開心嘅感恩節大餐

2 comments:

  1. 自己DO無咁甜~星仔好得意
    [版主回覆11/28/2011 14:11:42]謝謝,自己整可以控制油份同糖份,出面買又甜又多油,仲未必好食。

    ReplyDelete
  2. 批皮係邊度可以買到?
    [版主回覆01/04/2012 06:36:10]批皮我唔係買架,係自己整,你可以睇番上一篇講點整批皮,因為要雪4小時以上,我通常之前一晚整定,雪好第二朝整個批。要買我估大間超市都有,但通常只得個批底。

    ReplyDelete