自家製燒賣 Homemade Chinese Appetizer : Siu Mai

其實之前整過燒賣架啦，不過唔成功，因為買唔到燒賣皮，連春卷皮都冇，諗住試吓雲吞皮，唔掂，一D都唔似，又太大塊，要包到好大個，但就唔靚味道又唔平衡。今次去第二間超市搵到燒賣皮，於是就再接再厲，買過材料又整過。

明日係Veteran's Day假期，有人譯亡兵節，有人譯退伍軍人日，其實係紀念為國捐軀嘅士兵，但美國呢度唔係個個州都係法定假期，亦都唔係間間公司都會放假，以前我個部門冇得放，今年我地改咗，不過有少部份同事都要on duty，我呢D小薯仔就唔駛返工。

今晚因為學校有活動，去到差不多8點先返屋企，李生問我雪櫃D肉要整咩，如果今晚唔整唔知會唔會壞，我就話整燒賣，李生煞有介事咁問我係唔係用燒賣皮，因為上次果D完全唔似，係... 知道... 係燒賣皮嚟架... ...

材料：

免治半肥瘦豬肉　　半磅

中蝦　　　　　　　約10隻

燒賣皮　　　　　　約25張（1包應有過百張）

紅蘿蔔仔　　　　　適量

調味：

鹽　　　　　　　　半茶匙

生抽　　　　　　　1-1/2湯匙

麻油　　　　　　　1茶匙

胡椒粉　　　　　　少許

蛋　　　　　　　　1隻

做法：

1）蝦洗淨去頭去殼去腸，蝦頭蝦殼可以留返嚟熬湯，可參考之前整嘅磨菇濃湯。蝦肉切細粒再將部份拍爛。

2）蝦肉加入豬肉中撈勻，加入鹽、生抽、麻油、胡椒粉同撈勻。

3）雞蛋分開蛋白蛋黃，蛋白加入肉中拌勻，蛋黃略加留用。

4）將約一湯匙肉放於燒賣皮上，先摺起兩邊，再用手指摺起一頭一尾，成為一個四方形盒袋狀。

5）將四個突出部份搽上少少蛋黃收入盒袋邊，成為一個四方盒狀，只有最上面開口見到肉部份。

6）紅蘿蔔仔磨蓉，灑少許於燒賣開口部份。

7）鑊中加水煲滾，燒賣隔水蒸約10分鐘。

小貼士：

＊肉可以較得略為鹹少少，因為燒賣皮冇咩味，加埋肉就剛剛好啱味。

＊熱食一流，凍咗都OK，但再蒸熱會好食D，用微波爐叮個皮好快會硬。

＊千萬要買燒賣皮整，春卷皮都可以，不過一般較為大塊，要剪成細塊至啱用。

＊呢個大約係整25個嘅份量，但都要視乎你買嘅燒賣皮大小而定。

後記：李生話差咗D麻油香味，下次要整會加番多D。