親子豆腐忌廉芝士撻 Tofu Cream Cheese Tarts

一向都聽說用豆腐整忌廉芝士批係清淡口味，成日都想試但一直都冇機會，前兩日買咗盒豆腐放喺雪櫃，今日係退伍軍人日放假，但由早落雨落到黑，都冇得帶對仔女出外玩。下午見得閒，哥哥去咗婆婆度玩，得豬扒妹同李太喺屋企，我問豬扒妹想做咩，佢話整糕糕，其實整任何嘢佢都係當整糕糕架啦；於是就決定整個豆腐忌廉芝士餅，但屋企冇合適可以整批嘅baking pan，於是就改整撻啦。

撻皮（約12個細撻仔份量）

材料：

麵粉　　　　8安士（約225g）

牛油　　　　4安士（約113g）

糖　　　　　2安士（約56g）

蛋　　　　　1隻

鹽　　　　　少許

水　　　　　11／2茶匙

做法：

1）麵粉過篩拌入糖同鹽。

2）牛油切細粒加入麵粉後，以rubbing in方式混入粉中，直至完全混合，麵粉應呈微黃色。

3）打入蛋一隻拌勻，再搓成一個粉團。

4）粉團略搓，最後分成為12份。

5）每一份粉團壓成圓形薄片。

6）放入預先塗油的muffin pan內，壓實於每一個muffin cup中，以叉子拮一些小洞。

7）放入預熱350度之焗爐中焗15分鐘，取出攤涼備用。

豆腐忌廉芝士餡

材料：

豆腐　　　　1磚（約227g）

忌廉芝士　　8安士（約227g）

糖　　　　　1安士（約28g）

魚膠粉　　　7至10g

熱水　　　　2-1/2湯匙

薑絲　　　　約一湯匙

奇異果　　　1個（去皮切成6片）

做法：

1）豆腐隔水蒸熟，倒去水份。

2）豆腐置大碗中，以匙羹壓散，加入忌廉芝士拌勻。

3）加入糖拌勻。

4）魚膠粉先以熱水溶解，例入芝士餡中拌勻。

5）將芝士餡例入每一個撻皮中。

6）放入雪櫃雪最少一個小時定型。

7）食時放上薑絲同奇異果片即可食。

豬扒妹有幫手滾圓撻皮同壓成薄片，呢個左邊係李太整嘅，右邊係豬扒妹嘅傑作。

但同時豬扒妹都有偷食忌廉芝士餡，佢話試吓味，但就試咗好幾次，要我喝止。因為豬扒妹鍾意食奇異果，而李生李太對薑味情有獨鍾，於是就一半奇異果，另一半加薑絲。

食完後口感較淡，但有好香豆味，婆婆都話鍾意，因為唔係好甜，不過D撻皮都幾飽肚，豬扒妹同哥哥都食唔晒一整個。