講講感恩節之三：焗火雞 Baked Turkey

一講起感恩節就想起火雞，感恩節咭係火雞做圖案，派對裝飾又有火雞，連入去Google個homepage都係一隻火雞做icon，可想而知火雞幾咁深入民心呢。今年係李生李太第一年整火雞，因為今年哥哥入咗小學，學校有Thanksgiving Feast，叫家長donate火雞，我地就試吓整唔整到啦。

話說近年經濟唔好，好多人都樣樣慳錢，即使新年感恩節都想駛少D錢，對於可以慳一蚊幾毫都會一窩蜂咁即時jump on it。超市只要買滿$25就可以優惠價買特定大細火雞一隻，李生李太就揀咗一隻十幾磅嘅火雞，其實焗真係唔難，但花時間花精力。

材料：

火雞　　　　1隻（今次呢隻約16至18磅）

牛油　　　　約1／3杯

醃料：

鹽　　　　　2湯匙

胡椒　　　　1湯匙

Oregano　    半至1茶匙　

橄欖油　　　約2至3湯匙　　

做法：

1）雪藏火雞要先溶雪，放雪櫃中溶雪約需2至5日，視乎火雞大細，今次呢隻用咗3日。

2）洗淨火雞之後抹乾水份。

3）將鹽、胡椒、Oregano拌勻，抹勻雞身內外，之後擦上一層橄欖油。

4）以保鮮紙包裹火雞，放入雪櫃中，醃2小時至過夜。

5）牛油放入微波爐中溶解成流質，由雪櫃取出火雞，在雞皮上掃上牛油，放入預熱400度之焗爐中先焗半小時。

6）取出火雞反轉上下，於雞的另一邊掃上牛油，再放入焗爐焗半小時。

7）較細爐火至350度焗2個半小時，中間每隔半小時取出火雞反轉面，將流出嚟嘅雞汁淋上雞面，保持雞皮濕潤。

8）焗好之火雞以錫紙覆蓋，放至稍涼可切件上碟。

貼士：

1）焗火雞的確花時間，由溶雪至焗好往往幾日，所以要煮火雞就要預先準備妥當。

2）要雞皮唔乾又脆就要先以大火鎖緊肉汁，再以較細火候將火雞煮熟。

3）由於火雞一般都大隻，如果會時常煮（美國一般家庭最少一年都一次），值得投資買一個烤盤，上面有一個支架放火雞，下面一個金屬盤，方便取焗雞流出之汁液再覆淋上面；唔係就會好似李生李太咁要兩公婆一個逗起隻雞一個淋汁。

4）焗火雞還有好多方法，通常都會加入紅蘿蔔、西芹、薯仔等同焗，雞汁會流落盤下面，蔬菜吸收晒雞汁會更加好味。