雜錦涼拌

喺美國呢度生活，尤其是呢幾年經濟唔好，主婦都要精打細算。喺美國去餐館食飯食剩餸菜，個個都會打包拎走做第二日嘅午餐，冇人會笑你孤寒失禮，反而剩晒唔打包，一係就係難食，一係就係浪費。 

因為又做醃菜，今日有D嘢剩又唔想就咁掉咗去，所以就整咗呢個涼拌菜，由5種食料組成，略加少少心思就成為一味前菜或者下酒菜啦，因為係有唔同顏色，所以就叫做雜錦涼拌啦。 

材料： 

白蘿蔔皮　　　中型1個（真係新鮮蘿蔔皮呀，哈哈）
紅蘿蔔絲　　　1小個
波菜梗　　　　適量（今次用咗一磅波菜，菜葉做咗沙律）
蘋果　　　　　2個
檸檬汁或鹽　　1茶匙
水　　　　　　1大碗（足以浸過所有蘋果肉）

調味： 蒜蓉　　　　　1顆
乾紅辣椒　　　少許
鹽　　　　　　少許
麻油　　　　　1大湯匙
豉油　　　　　1大湯匙
凍水　　　　　1湯匙半
薑汁　　　　　半茶匙（可以唔加）

做法：
1）準備小大碗水，加入檸檬汁或鹽，以備浸蘋果用。
2）蘋果皮削出留用，削皮時最好直削，塊皮係打直嘅之後會好切D，將蘋果皮浸入檸檬水或鹽水中一會撈起，瀝乾水份留用，切成細絲。

 

3）蘋果肉先略浸鹽水，撈起切成細絲，將蘋果絲放回檸檬水或鹽水中一會，撈起瀝乾水留用。
4）波菜梗洗淨，切短段，以滾水灼一下撈起瀝乾。
5）白蘿蔔皮切絲，放滾水中略灼，撈起瀝乾。

6）紅蘿蔔切幼絲，以滾水灼一下撈起瀝乾。
7）把波菜梗、白蘿蔔皮、紅蘿蔔絲及蘋果皮分開排於碗底，蘋果肉排在碗中間。
8）碟於碗上，把碗反扣出各材料於碟中。

9）混合餘下調味料於另一個碗中，拌勻之後淋上碟中。

10）食時拌勻調味汁即可。

小貼士： 
1）選蘋果時最好買質地較爽嘅，切會容易D，又唔會因為果肉太粉，切完撈完之後斷開晒。
2）食時可以將多餘調味汁倒起先上枱，咁就會美觀D架啦。
3）鍾意食較為濃味嘅，可以麻醬代替麻油。
4）白蘿蔔要選較嫩嘅，表面有根嘅皮唔要，一來唔好睇，二來唔好口感。
5）白蘿蔔皮同生蒜本身都有辛辣味，所以我會先把白蘿蔔皮略為灼一下，如果唔食得辣，可以青瓜絲（連皮）代替，生蒜蓉可用少許油爆一爆就會又香又冇咁辛辣，另外，乾紅椒薑汁、都可以唔用。