家傳炆五花肉

突然好想整炆豬肉，好似台灣嘅滷肉，但保証正好多，呢個係我嘅家傳菜，由阿嫲教俾媽咪，再由媽咪傳俾我，不過我都唔係次次都做同樣嘅味道，有時會整甜，有時就鹹，睇果日心情。

今次整呢個係較為甜少少，因為落嘅糖份多D。

材料：
五花腩　　　2磅（要一層肥一層瘦，太瘦唔好食）

片糖　　　　1塊

水　　　　　適量（約半至一碗）

蒜頭　　　　2瓣

蔥頭　　　　1粒

醃料：

鹽　　　　　少許

生抽　　　　1湯匙

麻油　　　　少許

炆肉汁：

鼓油　　　　100ml

水　　　　　適量（約450ml）

魚露　　　　2湯匙

做法：

1）五花腩先出水，我今次係先用嚟煲肉湯，齊水落肉煮到滾後再細火滾10分鐘，肉湯我用嚟煮甘筍磨菇湯，肉撈起切成骨牌大小。

2）落醃料醃半小時以上，今次我係醃過夜。

3）燒熱煲下少許油放入片糖，加約一飯碗水煮到片糖完全溶解。

4）加入蒜頭蔥頭略爆，將五花肉放入煲中攪拌，等每一塊肉都沾上片糖溶液。

5）略煮片刻，加入炆肉汁材料，水可按肉多少增減，最好係水份剛蓋過肉，細火炆至肉鬆化，大約要1個小時，中途最好略攪動，等每塊肉都熟透。

分享：

1）唔想太甜可以減少糖份，加多少少魚露，就會係鹹味多D甜味少D。

2）可以加入香茅炆，略拍香茅，放入同炆會香D。

3）呢個菜都會出好多油，因為係用五花腩，可以等個菜凍咗油份凝結後用匙羹片去。

4）唔好用太瘦嘅肉，唔係就唔鬆化，仲會好乾好鞋。

呢個炆豬肉汁好送飯，淨係一煲炆豬肉加汁可以食兩三日，我屋企以前係用瓦煲炆，而家就用真空煲慳番D柴火，風味當然不能同日而語，好懷念阿嫲以前整嘅炆豬肉，好似寧舍惹味，淨係兩匙羹汁都可以食成碗飯。

後記：

第二日D肥油凝固會有一層白色油份喺面，我會用匙羹片起晒唔要。

再番滾過至食，第二日仲入味，第三日簡直係極品，因為已經好鬆化

以前我地屋企一煮呢個係大大煲，可以食四五日，李太爸爸同李太嫲嫲會買香花菜加汁拌食，我地幾兄弟姊妹就撈汁都食幾碗飯，而家嫲嫲已離世，爸爸年事已高，李太媽媽唔準佢食咁多，至於我地幾兄弟姊妹分開兩地難得聚首一堂，對上一次已經係七八年前，平日都係email、FB加電話聯絡，呢個菜都算係我地嘅家族集體回憶。