第118款：法國辮淑女頭

呢個係為一個網友諗嘅，因為佢話想學法國辮，但頭髮散同薄，而且反手梳法國辮會攰，所以就諗起整一個較為簡易嘅法國辮款式。首先，係架，梳法國辮好，荷蘭辮好，反轉手織係會好攰架，李太都會，但因為熟習咗，我梳得快就冇咁辛苦，有時攰就會一隻手抓實頭髮，另一手鬆吓再繼續織。

好啦，講番呢個髮型，我叫佢做淑女頭，因為中世界時代D有錢淑女多數係會將前面頭髮梳起唔遮眼，呢個前面望過去都有D相似。而整個髮型係以兩條法國辮組成，但唔係由頭織到尾，咁一來就唔駛反手織咁耐，二來適合初學未熟習梳法國辮嘅人士，因為每邊都只係約織四五組，唔似得成條法國辮加埋之後嘅三手辮部份，都要織成十幾二十組。

先分開兩邊界，再用每邊由頭頂至耳後嘅頭髮為本，由頭前方開始，續次由左右加入頭髮成為一條法國辮，織至耳後上方就以橡皮筋固定於頭頂，完成後就係兩條法國辮於頭頂，其他頭髮垂落。

前面睇係咪幾淑女呢？李太冇化粧，希望冇驚親你啦。