萬聖節後遇怪獸

今朝所見，講咗出嚟可能會俾人話，但我都係過來人，我一定唔會咁做。原來港女質素唔係香港女人獨有，呢邊好多白人都有，更有過之而無不及，比大陸煌蟲更厚面皮。

話說今朝搭巴士，可能係昨晚萬聖節，巴士司機玩得夜返唔到工，明明電子牌上寫Arriving，一轉頭就跳出8 minutes，心諗：「死啦，越來越多人，一陣上車唔只冇位坐，上唔上到都成問題」，於是把心一橫，見有時間就行番回頭路去上一個站等。

去到條龍都唔少人，平日小貓三幾隻等快車，今日條龍有十個人，走到龍尾，咁啱遇到朋友，佢當時食緊煙，排去我後面，剛剛開始傾第一句計，有個女人迎面而嚟，同我朋友講："Can you stay away from the line?" 我朋友冇出聲，走埋一邊食，個女人就笑笑口話："Because of the cigarette"。果陣我心諗：有冇咁大枝嘢？你怕煙味就自己走埋一邊啦，唔係叫人地走架嘛。我朋友食完枝煙行番埋嚟，同我講一陣個女人實叫人讓位，原來個女人大緊肚，我望清楚都應該有五六個月。

上到巴士真係幾多人，但仲有位，我上車時望一望仲有約四個位喺巴士車頭位置，呢d其實係三剎位，有disabled或seniors上車就要讓，我一向都冇問題，但今次......果個大姐上到車仲有兩個位，唔係最近門口嘅，但完全唔係太遠，只係門口數落第二排（由門口數過去第五六張椅），佢唔行去坐，居然企喺司機隔離同所有人講："Anybody？I'm pregnant"。真係火都嚟，我同朋友講我死都唔起身，大肚大晒咩？對腳唔係跛。我再望望佢對boots，有成兩吋高，咁緊張個BB就唔會要靚唔要命，兩吋高跟boots啦。有時對住呢d大肚婆，佢地覺得好似老馮咁，試過我一次讓完個位俾個大肚婆，佢仲要眼厲厲，怪我唔一早起身，但我根本睇唔到佢，周圍其他人都唔讓，佢連Thank you都唔識講，大姐呀，我都有俾錢搭車架，咁矜貴就揸私家車啦。

以前我大肚都試過讓俾個肚大過我嘅大肚婆坐，成車西裝友、後生女冇人會主動讓座，有d直情望住我好似睇怪物咁，我試過坐車去唐人埠，成車有一半以上係唐人，有老有嫰，冇一個人俾個位我，我當時陀住豬扒妹8個月，個肚好似人地生孖胎咁大，後來因為巴士急停我差不多跌倒，有個白人老婆婆起身叫我坐，佢已經有70以上，滿頭白髮，我話唔駛，但佢堅持話佢就落車，我咁樣好危險，但周圍三四十歲嘅人完全冇反應。

公民意識讓坐係好應該，我都教對仔女要讓坐俾老人家，不過我好少同佢地搭巴士，因為多數周末出街都係去買嘢，遠嘅揸車容易就時間，只係有時同公公婆婆去唐人埠，李生又唔得閒果陣就會搭巴士，以前間preschool要搭兩程巴士，李生好早返工，我返工又唔會揸車，因為泊車太貴又難搵，所以果陣就要帶佢地坐巴士，so far都OK，因為我地上車多數有位，問題不大，遇到冇位我會教佢地企好捉實d柱，而家學校係walking distance，唔駛再就時間趕搭巴士，對我係一種恩賜。

如果可以改變自己，凡事唔好咁自我中心，我覺得世界會和平d，不過世上怪獸何奇多，唯有時刻警惕自己唔好做怪獸。