第114款：荷蘭辮前陰側髮髻

呢排掛住寫煮嘢食嘅Blog，唔好誤會，我都係要日日幫豬扒妹紥辮架，唔會俾佢披頭散髮返學，我自己就一時時啦，而家反而係急切要搵時間染髮就真，因為D白頭髮又鬼鬼祟祟咁走出嚟，唔紥起都唔覺，一抓起頭髮梳辮就無所頓形架啦，有時就係咁索性唔紥起，但其實我係好手痕架，由細都大都鍾意玩頭髮，唔知你明唔明，真係一得閒就拎起頭髮左鬢下右橋下咁，我唔係變態架，我所識嘅長頭髮女生都係成日咁做，呢D嘢男生係唔明架啦。

OK，今日講嘅係一個髮髻髮型，梳嘅時候要先分成兩部份，第一個部份係一條前陰鬢辮，第二個部份係一個簡單髮髻。

首先由右邊約九一分界部份開始，用荷蘭辮嘅方式將前陰部份梳一條鬢辮，每織一組就由前方加入頭髮，織嘅時候要向後織，直至去到耳仔對上，就再以三手辮方式織到尾，以橡皮筋綁好。

餘下頭髮就全部拉到頭嘅左邊，於約耳仔後面位置束成一個馬尾髮圈，即馬尾去到最後一圈時，唔全條馬尾拉出，只拉出一半，成為髮髻嘅基礎，突出嘅髮尾部份，以同一方向（順時針或逆時針方向都可以）略為扭一扭實，然後繞住個髮圈，同時可以遮掩埋條橡皮筋，以髮夾固定位置。

第二個步驟就係將條鬢辮拉過去繞住個髮髻，以髮夾固定，一來令個髮髻更實淨，二來同時亦將條鬢辮嘅尾部跟橡皮筋掩藏入個髮髻入面。

後面睇係咁嘅。

左邊睇唔係好特別。

 

右邊就有D特式啦，同時唔係一個老土嘅梳髻法，加個靚頭飾去Ball都得架啦。