貴精不貴多

2011年11月2日

初初開blog，發現新大陸咁add咗好多網友，有少部份係朋友嘅blog，睇佢地個blog就好似見面咁，睇住佢地兒女點成長。另外大部份係飲食blog，因為我鍾意整嘢食，我呢度都有我整嘢食嘅紀錄，其實只係咁多年來冰山一角，始終我唔係日日煮飯果隻，好多時都係煮D家常嘢，耐不耐整D嘢食氹吓李生同對仔女，所以發現網上咁多食譜可以偷吓師，簡單開心到顛咗。再有一小部份係有關手作嘢同興趣嘅blog，因為李太都係由細到大鐘意整吓手作嘅人，屋企有成箱雜雜碎碎嘅材料，香港嘅屋企仲有幾十樣以前整落嘅陶瓷製成品，遲D細佬搬屋就會pack箱寄俾我，我都要諗吓放邊度，唔要我唔捨得，因為放咗冇一千都幾百個小時心機落去，好多都係我為某人或某原因做嘅，係我生命嘅一個重要部份。

好啦，講番我follow嘅blogs，由7月到而家，短短4個月，我足足加咗87個不同網友，自從Y!Blog升級後，recent updates成日都show唔到所有新update posts，之前未升級，好多Blog都睇唔到，而家升級進入第二階段，所有網都要強制升級或關閉，喺個網友link度，十個有兩個係冇相顯示，click去睇吓有時會有此網已關閉或冇此用者等錯誤訊息。把心一橫，都係時間清一清場，我加咁多個都唔係日日睇得晒，而且我當人地係網友，人地未必係，有時去搭咀comments都冇人回，我自己就一定回，因為係禮貌，或者係人家貴人事忘，唔得閒應酬我呢D小薯仔，試過去好心留言俾資料其他blog主，人地就只係回其他人冇回我，可能都係時候檢討下自己，費事好心著雷劈啦。或者我太死心眼，網上世界始終係虛擬，有幾真幾假都唔知。

都有時覺得幾無趣架，開個blog諗住分享吓，但好多posts都係冇人睇0 pageview架，算啦，就當自己寫日記，冇人同我傾計就我自己寫俾自己睇，當係相簿又好，notebook又好，或者日後睇番會有另一種體會。

今日的起心肝清一清場，將D我都好少睇或者以後都唔會多睇嘅blogs刪咗，個following由87個減到57個，其實都有D想刪，不過好多個都有少部份內量係我想睇嘅，或者等下一輪再cut啦。如果你個blog喺我個follow list度出現，即係話我會睇你個blog架，不過我真係唔係日日得閒去巡晒咁多個場架，應承得閒就去踩踩場，哈哈。