Monday, November 21, 2011

三藩市Cable Car遊記

2011年9月18日

李生有個好朋友係Cable Car司機,今日就帶豬扒妹同哥哥去坐鐺鐺車。點解Cable Car會叫鐺鐺車?因為Cable Car行車時司機會打鐘通知其他行人或行車,Cable Car將會通過,因為三藩市有地區路面比較狹窄,轉彎位有時視野有限,好容易睇唔到對頭車,就好似大霧時汽車都會不時響號嘅原理差不多;另外以前老華僑英文有限,好多時都會為日常生活不同事物人物安個別名,鐺鐺車係其中一個。

 


呢兩日天氣好好,去到鐺鐺車站頭(近漁人碼頭)陽光普照,早上還可以,到了中午有點鯉魚上岸就會被曬乾嘅感覺。一早行去Bay Street站頭,找上李生老友Uncle T。Uncle T係一個好風趣嘅人,對於逗小朋友佢真有一手。

今日Uncle T揸嘅係Powell/Mason線,Cable Car有好3條路線,都係行三藩市主要景點。第一條線係Powell/Mason,由Powell Market迴旋處經過Nob Hill去到漁人碼頭Bay Street為結,而Uncle T今日就係揸呢條線啦。第二條路線都係由Powell Market迴旋處出發,經過Nob Hill同Russian Hill,去到漁人碼頭Ghiradeli Square附近嘅Aquatic Park,呢一條線Powell/Hyde,雖然第二條路線都係由Powell Market出發,經過Nob Hill到漁人碼頭,但同第一條線中途經過地方不同,如果要睇出名嘅S型彎彎曲曲嘅花路Lombard Street就要坐Powell/Hyde,而唔係Powell/Mason,上車一定要睇清楚;而同時,Powell/Mason會經過Mason Street嘅Cable Car Museum同唐人埠。最後一條路線係California,沿住California Street由三藩市金融區,經過唐人埠、Nob Hill,到Van Ness Avenue終止。

呢度就係Nob Hill啦~


其實三藩市有D街真係好窄架,Cable Car經過時司機乘客都要打醒十二分精神。 呢度再落少少就轉入唐人埠範圍。



今次係第一次帶哥哥同豬扒妹去坐Cable Car,坐Cable Car好多人鍾意拉住旁邊扶手,企喺樓梯級上享受被微風吹拂嘅自由自在,但對於小朋友嚟講,安全係第一個考慮因素,所以哥哥同豬扒妹要李生李太攬實至可以坐喺VIP車頭位。






Cable Car都有指引規定,如果關係到安全問題,司機有絕對權力唔開車唔俾乘客上車或站立於某個位置。只有車前面一半部份有企位,同時亦有露出外面嘅兩排坐位,中間有可以俾乘客扶手嘅柱,每兩條柱中間只可以有兩個人站立,NO Exception!

其實見到兩條柱之間空位好少,企兩個人已經係極限,再多嘅話去到一D窄嘅地方真係好危險架。李生第一次正式露面,因為佢唔鍾意上鏡,Shhhh...唔好話佢知呀,唔係佢會要李太封Blog。



年紀大D嘅乘客或者係排唔到坐前面嘅乘客就要坐後面車廂,呢個同香港嘅電車差不多樣,連D窗門都似埋。






由站頭到站尾司機都有休息時間,而且去到站頭或站尾每間Cable Car都要掉頭,同香港嘅電車一樣,三藩市Cable Car都係用電,有電鑬在車頂連接,但由於已有百幾年歷史,好多操作都要人手~




每架Cable Car都有兩名工作人員,一個係於車頭嘅司機,另一個就跟喺車尾,負責幫司機睇位睇住乘客是否安全上車落車,尤其係呢條Powell/Mason路線,中間有個位置,副司機要落車人手去拉動扳機去引導Cable Car轉線。



1906年4月18日三藩市大地震,令到部份Cable Car車軌損毀,而就此開始部份Cable Car服務由streetcar取代,都係由電發動,到現在都係三藩市公共交通一部份。隨住時代變遷,Cable Car都經歷過唔少改變,由以前8條線續漸cut到而家只剩3條,其中California線亦曾因意外面臨取消危機,但Cable Car始終都係三藩市特色之一,遊客點衝忙都要坐一下Cable Car先叫做到此一遊。Cable Car司機一路都係清一色男性,因為完全係體力勞動,一定要有咁上下臂力先可以舞得掂架Cable Car,去到1998年1月15日,首位女性司機加入操作行列。

No comments:

Post a Comment