新年富貴雞（荷葉包雞）

網上見人整富貴雞，但網主只係講咗大概，未有食譜，於是我自己膽粗粗試整，試咗兩款做法，因為準備時間唔夠，所以未夠入味，但雞肉真係好嫩滑，個餡都好正，下次一定會再做足工夫，希望會更好味。

李太N年前去過灣仔美利堅食過果度最出名嘅叫化雞，好食到連骨都係酥嘅，D內餡仲正過食雞，真係咁多年都難忘，當年係李太媽媽移民後返港，生日時李太細路帶媽媽去食，仲要一早訂位同訂雞，成食雞三個人食唔晒，打包返屋企。

今次我想整嚟做2012年第一餐晚飯嘅主菜，但因為除夕去咗親戚屋企開party，日頭又冇時間去買料，於是就喺今日2012年1月1日去買，但帶完兩個小朋友去公園玩完再食中午飯後，已經係下午兩點幾，原本盤算時間唔夠留返第二日整，因為中間要風乾又要醃入味又要焗最少兩個鐘，但李生想整好拎一隻去俾62食，猛叫李太開始整，話會趕得到，但我地低估咗我地個老爺焗爐，其實呢排我已經覺得個焗爐有D問題，成日都要焗差不多雙倍時間至整到，今晚亦都唔例外。


因為買咗兩隻雞，所以我試咗兩個做法：
1）荷葉包雞之後用錫紙包實。出嚟結果係個荷葉包雞剛剛好熟，肉嫩滑皮又上色，但D汁漏出嚟；

2）荷葉包雞之後，用麵團包實。 出嚟結果雞有D太熟，所以雞皮黏實荷葉，一打開塊荷葉塊皮都甩埋，加上個麵團太薄爆咗口，肉汁漏咗出嚟，肉依然係嫩滑，內餡都好味，但餡嘅肉絲就鞋咗D，我估係因為肉汁漏咗出嚟，做唔到煨嘅效果。兩隻雞都好味，要改進嘅係要整一個厚D嘅麵團，hold住D肉汁嚟煨熟隻雞，但時間上又要耐番D。