基本髮辮編法9：四手辮之1 4-Strand Braid 1

而家講呢個係真真正正四手辮，唔係半法國辮，之前都一直誤會咗，後來睇到有人喺Youtube示範7手辮，無錯，係七手辮，原來知道個原理後，七手辮都係碎料，當然頭髮要夠長先有用，如果太短，根本鬢唔到幾組就冇頭髮再鬢落去，唔會睇到個Pattern架。

 

講番四手辮，同三手辮差不多，其實鬢嘅時候都係三手頭髮在手，第四手就變成第二組三手辮嘅第一手，或者文字上好似複雜咗D，但睇圖應該會容易明白。

1）將頭髮分成四等份：1、2、3、4

2）以三手辮方式將1、2、3束頭髮鬢成一組三手辮，第1束頭髮由上面橫過第2束頭髮，再由第3束頭髮下面穿過。於是你會見到左邊一條三手辮，右邊就有一束單丁頭髮。

3＆4）第4束頭髮於第1束下面穿過，再由第3束頭髮上而橫過，你又會見到右邊一條三手辮，左邊一束單丁頭髮。

5）去到呢度，就再重覆步驟2至4，唔駛一定記低邊條打邊條頭髮，個重點係你只係一次過處理一條三手辮加一束單丁頭髮。

6）織完條四手辮會比普通三手辮闊，同埋較為扁平，望落條辮係比普通三手辮複雜D精緻D。

秘訣：

1）記住由左織去右時係最左邊果束頭髮一定係先由上面橫過第二束，如果由右織向左時就最右邊果束頭髮會由下面穿過第二束。其實只要跟住個原理，好似織滕籃咁，隔離果條係突上嚟，你就要打橫喺上面蓋過去，如果隔離果條係俾之前果條蓋過，咁今次你就要由下面穿過。

2）有4束頭髮喺手，你織嘅時候其實只係3手，第4手頭髮係單獨，等到下一組先織入去，所以你可以當係為織緊一條三手辮咁就會覺得簡單好多架啦。

咁有1即係有2啦，仲有另一個方法梳四手辮，同呢一款唔係差好遠，只係中間個原理有少少唔同，記得去睇埋另一款梳法，睇吓邊款啱你心水。各位媽咪嗲D，奸爸嗲。
P.S. Yahoo Blog今日又Short Short地，加相要好多次先加到一張，我唔加住啦，出晒D字先，今晚返到屋企再試。終於攪掂啦，相加晒啦。