2011年10月23日
我個寶貝豬扒妹萬聖節會扮魔髮奇緣中嘅Rapunzel，我諗嚟諗去都唔知幫佢紥邊款髮型適合，呢個其實最啱，但同豬扒妹試過，佢頭髮唔夠長唔夠多，梳唔出個型，所以我就自己示範，希望俾其他媽咪或姊妹睇吓，如果咁啱你地千金或你地會扮長髮公主的話，呢個可以派上用場。
首先由一邊頭頂開始，抓一束頭髮開始鬢一條荷蘭辮，只由後面一邊加入頭髮，切勿加入太大束，因為之後我地要有足夠頭髮至可以梳到呢個髮型。一路向後編至一定長度，將條荷蘭辮從側邊繞過所有頭髮，記住要抓緊條辮，之後向同一個方向繼續織條荷蘭辮，當一樣又係織到一定長度之後又以同樣方法從側邊再繞過所有頭髮，如此類推一直織到所有頭髮都加入晒條荷蘭辮為止。我呢個繞咗四次，你話好難又得唔難又得，難在要抓緊條辮，當繞過所有頭髮之後要順番個方向繼續編，唔好亂咗唔知點織；唔難就因為都係一條荷蘭辮，只要識咗點織就唔難啦。
No comments:
Post a Comment