第105款：懶人版瀑布辮 Simple Waterfall Braid

2011年8月21日

正式瀑布髮辮我未喺呢度示範過，因為豬扒妹太active，我估喺學校唔夠幾個鐘就會散晒成隻顛雞仔咁，所以一直都冇話正式幫佢紥晒成個瀑布鬢辮，而家介紹呢個係懶人版，或者可以叫簡易版，因為唔駛鬢辮，時間會慳番唔少。

首先將頭髮分成兩邊，每邊由頭嘅前方到頭頂頭髮分成4份，抽起第1小束頭髮，束成小辮，之後再加入第2份頭髮束成另一條辮，紥時第1束頭髮留下一半唔加入第2束，由得D頭髮垂落嚟，如是者加入第3束頭髮時第2束頭髮又係留下一半，第4束如是。

當完成晒兩邊頭髮後，將兩條拼髮辮綁埋一起，梳一梳之前留低垂落去嘅頭髮，咁就完成啦，望落同瀑布髮辮個效果差不多，而且比瀑布髮辮更結實，因為瀑布髮辮以鬢辮嘅方法，但呢個懶人版係有幾條橡皮筋束實，唔會咁易散，而且功夫少D，用嘅時間都少好多。