椰汁花花大菜糕

2011年10月10日

呢個椰汁花花大菜糕係我睇個大菜糕包裝，再加自己配搭整架，試咗個份量唔太甜又清爽。

材料：

大菜糕　　0.5安士（我買1包1.5安士可以分3次用）

清水　　　4杯（量杯上有刻度寫1杯約8安士，即半磅）

砂糖　　　8安士

椰汁　　　1罐（約10安士，我買椰青水，清D冇咁甜）

雞蛋　　　2隻

今日嘅助手：豬扒妹... ... ...基本係淨睇同問嘢，冇落手，因為今日整嘅主要係煮，唔可以俾佢整住。

做法：

1）先加水入煲內，倒入椰汁，加入大菜，煮滾。

2）加入砂糖，煮至糖及大菜完全溶解。

3）熄火，把兩隻雞蛋打入溶液中以木匙攪拌成為蛋花。

3）倒入杯中，靜待約1個鐘就會凝結，喜歡凍食可放入雪櫃中半小時後可食。

小秘訣：

1）蛋花要做得靚一定要熄火後先放入，一邊倒一邊攪拌。

2）大菜糕要等一段時間先會凝結，最初15分鐘會仲係好流質，千萬別以為放唔夠大菜再加，否則就會過硬。

3）想食較硬身大菜糕，可以加多少少大菜，但因為大菜較輕身，要加都不要過量。

4）食時可反扣放碟中或直接由個杯中取食。

小李生好俾面咁食咗半杯，豬扒妹食咗唔夠半杯，因為之前食飯食得好飽。好鬼錫佢地唔會因為好食鍾意食，就算好飽都會不停食，所以暫時唔會有痴肥問題出現。LOL