今日原本想去食上海嘢，點知去到Sunset兜咗成20分鐘都搵唔到車位泊車，唯有去過第二度，有時喺美國，尤其是三藩市，泊車位緊過債，冇位泊車唯有去過第二度食，有好多朋友試過double park或者諗住都係一陣啫，差少少唔係咁大問題，但偏偏一張牛肉乾閒閒地US$五六十，夠一家大細食餐好嘅，而家個City窮到燶，搏唔過。於是我地一家四口就去咗李生個朋友嘅中式餐館食午飯。
入到去勁多人，因為佢地有做旅行團，好多時旺嘅會訂三四張枱，咁就要等位。今日都算好彩，四人枱唔駛等。
我唔知老闆係邊度人，菜大部份係台式，好好食，唔係因為我地識得個老闆先咁講，係真係好味，而且D料新鮮，但就比較濃味，我估有少少味精，不過我可以接受，只係要飲多D水；事緣我對味精有敏感，太多嘅話我會頭痛，而且會好似飲醉酒咁wing wing地，對仔女都唔係好受得味精，太多仔仔個咀會腫皮膚痕。
今日李太叫餸，我都覺得我有D過份，幾驚會俾李生鬧，4個人食8個菜會唔會過份D呀？不過唔係個個都大大碟，又唔係樣樣都貴，所以李生冇出聲，唔出聲我當佢OK啦。
第一個上碟係醃涼拌青瓜，巧巧味又唔係大大陣蒜味，青瓜去咗皮冇咁爽但唔係淋晒，絕對新鮮，連對仔女都肯食。影相時已經有人急不及待食咗三份一啦。
第二個係甜豆漿，我唔知係唔係自己整定買，不過就好滑，應該唔係開粉果隻，豬扒妹同小李生兩個已經幾乎掃晒一碗，好在唔係好甜味。
第三個係油炸鬼，呢樣係李生至愛，我地成日去搵邊度嘅油炸鬼好食又唔貴，五褔樓呢個夠脆口又鬆化，只係食到尾都係有D煙un，點都冇香港D粥粉麵舖咁好食，冇計啦，有時真係好想食都頂住癮先。如果有人知點整到好食嘅油炸鬼，勞煩你俾個recipe我啦，我想整俾李生食呀，佢好鬼為食架，成個細佬仔咁。今日對仔女太肚餓，油炸鬼一上枱就一人搶咗一條，豬扒妹肯俾番一半我，小李生就唔肯，攪到李生好無癮，最後我俾咗豬扒妹俾我果半條俾李生，不過就冇得影相啦。
第四款係飯團，即係栥飯，中間係油炸鬼、少少炸菜、肉鬆等，不過呢個未到水準，可以唔駛試啦，因為油炸鬼唔夠多唔夠脆，炸菜同肉鬆都太少，飯太多，個味唔平衡，雖然唔貴，但可以不試。
第五款蔥油餅，份量唔多但唔少，細細件都幾好食，比起之前Union City果間小沈陽都仲係遜色，沾個紅油抄手辣汁一流。
第六碟係紅油抄手，份量好多好大碗，D抄手都好大隻，辣油對我嚟講唔夠辣，略帶甜味，我會喜歡較為辛辣少少，李生就一般，佢話唔夠辣，哈唔，太辣我估佢食唔到喎。
第七個係麻辣牛肚，呢個餸係李生近排至愛，去到任何餐館酒樓就要睇吓有冇，呢個牛肚好有水準，牛肚厚薄恰到好處，而且夠軟但又夠爽，辣汁我略嫌味淡咗少少，我想要辛辣少少，有人個侍應一放低隻碟唔夠半分鐘就食咗三份一啦。
最後一個係上海炒年糕，呢個係我地食過咁多個最夠味嘅，份量算唔錯，豬扒妹同李生始終鍾情上海年糕，五褔樓呢個整得好軟身但又唔痴牙，切得細細塊吸晒D汁，豬扒妹同小李生最乞人憎就係唔識肉，要我揀晒D肉絲出嚟，你逼佢食咩，佢地就扁晒咀要split out D渣，然後話辣辣或者too hard，激死我。呢日個上海年糕我同李生都係食咗幾啖，兩個小朋友係食完又食。
餐館老闆今日忙到不得了，老公想同佢傾幾句都唔得閒，點知佢無端端放低呢一碟話請我地食，呢碟係涼拌海藻結同豬耳絲，條條海藻打個結都咪話唔好心機，我麻麻地有陣海藻腥味，個醃汁我唔係好鍾意；個豬耳絲好爽脆，我比較喜歡，李生都like，不過佢嘅至愛都仲係牛肚絲，佢話D豬耳硬，太脆佢唔係咁好。
嘩，叫咗8個餸，我地食得七七八八，打包咗剩低嘅少少炒年糕同一塊蔥油餅加少少涼拌海帶同青瓜，個炒年糕同蔥油餅成為小李生第二日返學帶嘅午餐。講你都唔信，最後埋單係連稅US$45，加埋貼士50幾，仲有剩餸拎走。
呢度D中式餐館有樣嘢唔好，就係品質保持唔到，好一輪又差一排，通常係因為換廚師。五褔樓都有一輪麻麻地，而家就好有水準，所以就呢兩個星期都去過三次啦。
想去嘅話，五褔樓Five Happiness個地址係4142 Geary Blvd., San Francisco, CA 94118 (5th Avenue同6th Avenue中間，隔離係KFC），泊車都算OK，搭車仲方便，門口同對面街有#38同#38L巴士站，班次係數一數二多同密。
http://www.yelp.com/biz/five-happiness-san-francisco
P.S.中午時段會有點菜紙俾你揀餸，晚飯就有和菜同餐牌俾你點菜。
No comments:
Post a Comment