打救Blog layout, 靚多一點點

自從Y!Blog升級後，好多嘢都冇以前舊Blog咁方便，最大而又最多人嘈嘅就係字嘅大細，因為D字設定為13px，出到嚟D字太細，唔好話年紀大D嘅網友，就連我呢D中女都覺得睇得好辛苦，以為自己提早有老花，上網睇Blog寫Blog都係尋開心，搞到寫Blog睇Blog係一件苦事就無謂啦。雖然網友可以改字體大小，只要按Font Size將字嘅大小由Normal做Large，但點知Large係等於21px，咁又太大啦，而且一改大小呢，行與行之間嘅距離同字與字之間嘅距離又冇按比例自動調整，所以就算用咗大字體都係睇得好辛苦。

無意中喺網友Kazuo嘅Blog睇到，覺得好好用，所以問咗Kazuo之後，喺呢度分享個方法，希望大家網友用得著，可以整靚D個Blog。


首先寫完篇文之後，可以Click去HTML editor 編輯器個tab，跟住會見到一大埋符號，其中你一定會見到font-size: 13px，如果你改咗做Large大字體，就會見到font-size: 21px，想做個中庸選擇，可以用15-18px其中一個數，打個比喻你想要18，咁你就只要將13改做18或其他你想要嘅大細。

呢個係正常Normal字體：font-size: 13px

呢個係大細18點嘅字體：font-size: 18px

最後呢個係Large大字體：font-size: 21px

至於字與字之間嘅距離可以加上letter-spacing: 1.5pt，咁字與字之間距離會加闊咗，唔會逼埋晒。

呢個係大小18px字距離冇改嘅效果

呢個係大小18px字距離改為1.5嘅效果

呢個係大小18px字距離改為2.5嘅效果

再講到行距，當你有一大段文字，如果加大字體之後就會上下逼埋一堆，要改個行距可以用同樣方法加上line-height: 200％，咁行與行之間空位就會變多咗。

呢個就係字體18px，
字距1.5pt而行距冇改
出嚟嘅效果

而呢個就係字體18px，

字距1.5pt而行距改為200％
出嚟嘅效果

而呢個就係字體18px，

字距1.5pt而行距改為150％
出嚟嘅效果

原文可以去Kazuo個blog度，有兩三個posts講。李太自問都係一個電腦低能，但如果只係少少步驟就可以令到睇自己個Blog嘅人睇得舒服，咁又何樂而不為？好過坐喺度等雅虎去改，以Y!Blog而家龜步前進嘅改善速度，我唔知要幾耐先會令呢個先天不足嘅環境變成user-friendly，可能等到下次upgrade都未等到。

希望以上少少幫到大家網友，如有唔明白可以講出嚟研究研究，有好方法就請有能之士多多分享，與其日日鬧Y!Blog，不如自求多福，學多D去裝備自己。

Kazuo Blog Post