第107款：簡單拼髮蛇辮之2

2011年10月11日

呢個係近期新作，簡單快趣又得意，因為豬扒妹成日都會玩到披頭散髮，太麻煩嘅甩咗老師唔知點幫佢紥番，所以都係整D簡單嘅，甩咗都唔太醜樣嘅就好。

我由少D頭果邊（左邊）開始，由頭前方抽一小束頭髮紥成一條小辮，跟住將耳後果D頭髮劃出加入之前條辮拼成一條新辮，之後就再加入後腦中間一大束頭髮，又束成一條辮，去到呢度應該只剩下右前方至耳後頭髮，我就將剩底嘅頭髮綁成一條辮仔於耳側，成個蛇辮就完成啦，成個過程只係紥4條辮，用4個橡皮筋，5分鐘都唔駛。

 

你睇到呢張相可能會問點解豬扒妹塊面會咁損晒，無他，兩兄妹打交，唔好以為哥哥蝦妹妹，其實好多時都係豬扒妹出手打哥哥先，哥哥痛唔抵得就還手，咁哥哥指甲長得快，成日都會抓損豬扒妹，不過你地唔好睇小呢個妹妹，佢好狼架，大巴掌打大腳伸，如果唔問清楚就怪哥哥就唔得架，次次我都會問清楚，然後兩個都要罰。希望兩個大咗唔會成日打交啦，其實佢地兩個好錫對方，唔見就會搵，有嘢食都會留對方一份架。聽過人講: "Brother and sister are the best friends and the best enemies"，完全切合。