菠菜兩食 - 前菜：香油菠菜; 主菜：菠菜炒雞冬菇絲

有棵菠菜喺屋企，諗吓點整先有新意，上星期喺餐館食過一碟炒菠菜好好食，
於是整咗兩個菠菜菜式，一個係前菜，一個係主菜。

前菜：香油菠菜

材料：
菠菜莖　　1紥（菠菜葉洗後留用作主菜）

蒜頭　　　1至2瓣（切碎）
菜油　　　兩至三湯匙
美極醬油　數滴

做法：
1）滾水加入菠菜莖，灼至熟但不要太軟，撈起待用。
2）蒜頭放入鑊中加油爆至金黃色。
3）襯熱淋上菠菜莖上。
4）灑上幾滴美極醬油調味。

主菜：菠菜炒雞冬菇絲

材料：
菠菜葉　　1紥（洗淨）

雞蛋　　　1至兩隻
冬菇　　　隨意，以水浸最少半小時，切絲，浸菇水留用

雞脾肉　　1塊切絲

雞脾肉醃料：
鹽　　　　少許
鼓油　　　約1湯匙
橄欖油　　約1湯匙
生粉　　　半茶匙

調味：
鹽　　　　少許
糖　　　　少許
蒜頭　　　2瓣（切碎）
鼓油　　　適量

做法：
1）雞蛋煎成蛋餅，切絲留用。

2）冬菇落鑊加入浸菇水中火炆至軟身。
3）雞肉炒至表面全熟，取出留用。
4）蒜頭落鑊加油爆香，加入菠菜葉，加鹽、糖炒至軟身。
5）加入冬菇及雞肉炒至全熟後，再加入雞蛋絲炒勻。

6）熄火試味後可加入適量鼓油調味。


秘訣：
1）菠菜都頗為易藏污，必須洗淨先，可加少許鹽浸一會再撈起。
2）菠菜一落鑊就縮水，所以可以整出嘅份量有限。
3）煮菠菜加少許糖可以令菠菜食落冇咁鞋。
4）其實以上加入之調味料除了醃雞外，都係減到好少，靠材料本身嘅味道，所以選料要新鮮。