講講萬聖節之二：買南瓜Pumpkin Patch

Pumpkin Patch幾乎已經係美國家庭於萬聖節之前必有嘅活動，通常大人會帶小朋友去農場或南瓜園選購南瓜，有D Pumpkin Patch南瓜場其實只係一個空地佈置得好有萬聖節氣氛咁，放滿南瓜、Gourds、粟米等，有D會有小動物俾小朋友睇，好似火雞、白兔、山羊等。

之前一兩年我地有帶對仔女去Pumpkin Patch，因為當時間Preschool有活動，但果兩年因為落雨都成日改期，試過有年改咗兩次，我地特登請假同對仔女去，但就係因為改期，平白浪費咗兩三日假，後來又有Halloween Parade又要攞假，當然呢個係自願性質活動，家長可以唔參與，但如果可以，有家長參與，小朋友會開心D，我同李生都做過好多Chaperone，睇到有家長一齊嘅小朋友玩得開心好多，而且我地可以影吓相，日後可以留個紀念。

今年哥哥上幼稚園，學校只有Parade，唔會有Pumpkin Patch，豬扒妹嘅Preschool都唔會有，原來想跟朋友去一個Harvest Festival，點知今年又Miss咗，因為係喺十月頭，當我問朋友時原來已經完咗，咁就無謂長途沷涉去到咁遠，三藩市都有兩個南瓜場，之前都去過，但因為呢排好忙，加上病咗一個星期，而家都未好，李生又覺得好似幾貴，一個細南瓜幾蚊雞一個，所以遲遲都冇提去Pumpkin Patch。

冇耐之前見到Safeway有南瓜賣，仲有迷你版同巨型版，所以星期日就帶咗豬扒妹同哥哥去揀。

著好衫啦，影張相準備出發啦。

沿路見到紫色花仔，豬扒妹好鍾意，哥哥好奇想摸吓。

又同呢對活寶影張相先。

一路行我乘機教育吓佢地洗吓腦，
我問佢地：「一陣入到超市要點架？」
豬扒妹話；「唔好搞嘢，唔好喊，唔好打哥哥，哥哥唔好打我，唔好打媽媽，唔好扭計，唔好叫媽咪買嘢...」
問你驚唔驚？即係話平日佢地兩個有幾百厭！去到佢地拎咗一人一個，哥哥再拎多個，我話要咁多做咩？
哥哥話：「呢個俾爸爸架。」
妹妹唔執輸拎多一個：「呢個係媽咪。」去到俾錢，四個南瓜$3.16加稅，如果去南瓜場，一個都買唔到，係就係細個D，但太大個我冇本事拎到返屋企，我地雞膶咁大間屋，大南瓜放唔落。

OK，又完成咗一樣Halloween要準備嘅嘢啦。