再來一個醃菜：紅白蘿蔔蘋果

之前醃過一個黃芽白彩虹椒，李生可以當飯咁食，佢係一個人拎住個玻璃樽，揸住對筷子夾，好明顯係想一個人食晒成樽啦！李太爸都食得好開心，佢只係密密夾冇出聲，第二日出唐人埠就買咗個中型白蘿蔔，李太媽話李太爸想食醃蘿蔔，屋企又仲有紅蘿蔔，於是就整呢個紅白蘿蔔醃蘋果啦。蘋果係上次網友Maggie Kitchen話加蘋果同梨做醃菜會好食，橫豎屋企剛剛又買咗蘋果，試吓無碍啫。

材料：

白蘿蔔　　　中型1個
紅蘿蔔　　　細條2至3條　
蘋果　　　　中型2個

醃料：

醋　　　　　適量
蒜頭　　　　1顆
乾紅胡椒　　半至1茶匙（視乎口味加減）
鹽　　　　　少許
黑胡椒粉　　少許

做法：
1）白蘿蔔去皮，切成細塊長條狀，約手指長度。蘿蔔皮不要丟掉，可留用做雜錦涼拌。
2）紅蘿蔔去皮，一樣切成細長集狀。
3）蘋果去皮去芯，切成塊狀，蘋果皮可用作做雜錦涼拌。

4）把白蘿蔔紅蘿蔔蘋果相間放入玻璃樽裏面。
5）倒入醋和其他調味料，蓋上樽蓋，略為搖勻，醋要蓋過所有材料。

6）放雪櫃兩至三日就食得，試味後如果未夠醋味可再醃耐少少，通常兩至三日就OK。

小貼士：
1）我用日本蘋果醋，會帶少少甜，如用白醋，可以著量加少許糖以中和酸度。
2）蘋果以較爽肉質為佳。
3）唔食得辣可以唔加乾紅椒同黑胡椒粉。
4）呢個方法醃青瓜都可以。
5）唔好浪費，削出來嘅蘋果皮、白蘿蔔皮可以做雜錦涼拌，係一個簡單省錢嘅前菜和下酒菜。