為小朋友做菜之10：焗肉丸兩味

因為仔仔學校去周年旅行，所以我特別整咗幾樣嘢帶去，其中一款（兩款）就係焗肉丸，平常仔仔唔食肉，但會食肉丸，相信係finger food嘅關係，由細到大佢都鍾意用手拿食物，我估係因為觸感方面，佢要觸摸去感覺，如果唔係D咩場合，我都由得佢，去旅行只要洗乾淨對手，而食物唔係會食到一手油，用手拿都可以接受嘅。初初諗住就咁整普通肉丸就算，但睇下舊肉咁dry，於是又加咗好多不同菜蔬，況且到時會分俾其他小朋友，有菜會健康D，搓搓吓又諗，如果香口D，小朋友會鍾意多D，但我唔想開大鑊油炸，於是就加咗麵包糠用芝士焗多一款啦。

材料：
豬肉     1磅
蘿蔔     1杯（約兩三細條）
西芹     4瓣
芫茜     適量

調味： 
鹽      半茶匙
豉油   1湯匙
糖      少許
粟粉   1/4茶匙
水      1湯匙
麻油   半茶匙

芝士肉丸另需：
麵包糠 3至4湯匙
芝士粉 2至3湯匙

做法：
1）將豬肉刴爛或買現成攪碎豬肉，蘿蔔磨蓉，西芹切細粒，芫茜刴碎。
2）將所有材料拌勻，加入調味攪勻，用手略為撻幾下，等肉起膠質。

3）將一個焗盤鋪上錫紙，將約1湯匙肉料搓成圓形肉丸，排放於焗盤上。
4）焗爐預熱375度F（180度C），將肉丸焗10分鍾，反轉另一面再焗5分鍾至熟透。

芝士肉丸做法：依以上做法，另將麵粉糠同芝士粉混合，將肉丸沾滿麵包糠芝士粉後排焗盤上，依法焗熟肉丸。

小貼士：
1）肉要買帶有肥肉，否則焗完又乾又瘦，想小朋友食都幾難。
2）加入之菜蔬要切細，搓肉丸時至會好睇，如果小朋友唔鍾意食菜蔬，呢個步驟更可以令佢食咗都唔知。
3）芫茜可加可唔加，另外可以加入洋蔥或薯仔粒。
4）用silicon baking sheet比錫紙更方便，又冇咁易燶，否則就最好查看同反轉多次，以防止肉丸焗燶同黏住錫紙。 5）豬肉要煮熟，但太熟就會好乾，焗嘅時間要根據個別焗爐爐溫調較，搵枝牙籤拮入肉丸，抽出嚟冇肉黏住就係得架啦。