乾炒牛河 Stir-fried Ho Fun wtih Beef

乾炒牛河係李生至愛，佢成日去餐館都會叫呢個，不過出面餐館一般炒得好油，無他嘅，餐館唔係用易潔鑊，炒鑊果個唔會想炒完洗一大餐，於是要唔黏鑊就會加好多油炒，有時食唔駛拎番屋企，第二日帶飯，入微波爐叮完之後就成個碗底都係油，以前自己初初炒唔係斷晒就係痴晒鑊，而家唔同啦，我用好少油之餘，河炒又唔斷又唔會糊晒，心理上係健康過出面食。

材料：河粉     1包
洋蔥     1/3個
芽菜     適量（我買包裝1包，用咗半包）
牛肉     半磅
蒜頭     兩粒
蔥        1條

醃牛肉調味：
鹽         少許
胡椒粉   少許
豉油      半湯匙
粟粉      1/5茶匙
水         少許

炒粉調味：
豉油         1湯匙
老抽         1湯匙
美極醬油   1/2至1茶匙
鹽           少許
糖           半茶匙

做法：1）牛肉橫切成塊，加入醃肉調味，置一旁醃15分鐘。

2）芽菜洗淨瀝乾水，洋蔥切頭尾部份，切片再撕開一層層成洋蔥條。

3）河粉撕開一條條，置一旁待用。

4）蒜頭去衣拍幾下，青蔥洗淨去衣去根，切成一段段。
5）易潔鑊下牛肉片煎至約8成熟，取出待用。

6）同一隻易潔鑊下少許油，蒜頭爆一爆，加入洋蔥炒至變色，之後加入芽菜、蔥段炒至軟身。

7）河粉加入鑊中，用一對筷子將粉同洋蔥、芽菜炒勻。

8）加入炒河粉調味料，用筷子快手拌勻至河炒完全上色，加入牛肉略拌勻就可上碟。





小貼士：
1）牛肉先不要炒，只要兩邊煎至8成熟，如果唔係就好容易過老變硬。
2）河粉一定要撕開一條條，呢樣唔懶得，唔係一落鑊就痴埋晒，用鑊鏟不易分開河粉，只會整斷晒。
3）河粉不用汆水過冷河，撕開一條條後最好放一個兜或筲箕中。如果驚唔乾淨，充其量用少許暖水沖一沖，放於筲箕中晾乾或抹乾。河粉洗水後會變軟，一炒就斷之餘仲會炒到痴埋一舊舊。
4）調味其實好隨意，如果覺得唔夠味或唔夠色，可以加多生抽或老抽。
後記：
李生食完好鍾意，不過佢話D粉好食過牛肉。因為李生鍾意食，李太加咗重料牛肉，但李生話D粉好味過D肉，所以揀咗好多肉出嚟冇食。仔仔一向都係唔肯食肉，呢個佢都係食粉唔食肉，早知就齋煮炒粉，而家D肉好貴，唔減價都唔多買得落手。