墨西哥牛油果醬 Guacamole

加州好多墨西哥人，所以墨西哥餐廳周圍都有，去到食墨西哥嘢，都會有兩三個醬俾你用嚟沾粟米片食，其中一個就係綠色用牛油果做嘅Guacamole。牛油果熱量好高，減肥就真係唔好多食，其實食落都知，牛油果味濃質厚，我自己冇可能食得晒一個，小朋友食都仲OK，發育時間有運動就唔駛驚，但年紀大就要小心啦。

材料：牛油果   兩個
檸檬或青檸 1個
洋蔥 半個
細蕃茄   1個（或大蕃茄半個）
Cilantro    2湯匙
蒜頭 兩粒
鹽     3/4茶匙
黑胡椒   1/2茶匙
青辣椒   1小條(jalapeno pepper)
孜然粉   1/3茶匙(cumin powder)

做法：1）檸檬切開搾汁，隔去核留汁。
2）牛油果切開去核刮出果肉壓爛，加入檸檬汁攪勻防止氧化。

3）洋蔥切細粒，蕃茄去皮去籽，淨肉切細粒，瀝乾水份待用。

4）Cilantro洗淨抹乾切碎待用。蒜頭刴成蓉待用。青辣椒去蒂切成細粒。
5）將洋蔥粒、蕃茄粒、Cilantro碎、蒜蓉及青辣椒粒加入牛油果中拌勻，加入鹽、黑胡椒碎、孜然粉拌成醬即成。

小貼士：1）牛油果易壞，買時要小心揀，做呢個醬用較熟嘅牛油果會容易D。
2）蕃茄可以用罐頭蕃茄粒隔去汁液。
3）Cilantro如果買唔到，可以用芫茜或蕃茜parsley代替，口感雖然會有少許不同，但香味都係不差太遠。
4）青辣椒係指墨西哥果種Jalapeno pepper，係好辣下架，處理時最好戴上手套，或處理後洗乾淨手及避免接觸到眼睛或面部。如不能吃太辣，可以完全唔加或改用其他辣椒。
5）除咗粟米片之外，將此醬塗上餅乾或略烘之法包上都美味。

後記：

今次有小助手豬扒妹全程強制幫手，除咗用刀用壓爛牛油果之外，李太都盡量解釋，做到的都俾豬扒妹做，佢做得好開心，做好仲非常開心咁報告俾李生同哥哥聽，但仔仔就呷醋，話唔睬媽咪，因為媽咪只叫妹妹幫手，但仔仔同爸爸睇Y試車片段睇得好開心喎。