第131款：法式孖辮馬尾French braids ponytail

其實呢款係無心插柳，幫豬扒妹梳辮有時係靈感所致，今次都係，因為豬扒妹對馬尾情有獨鍾，好多時都會叫我紥馬尾，但而家返學佢都仲會有午睡時間，紥馬尾好唔方便，而且紥咗等於冇紥，佢瞓覺一定會自己拆咗條辮，所以通常都會係周末至會幫佢紥馬尾。

首先係將頭髮分成兩邊，每邊由頭前面開始分三份，先織一組三手辮，之後由最開面加入頭髮，每織一組加一小束，織嘅位置係中間分界同耳仔髮際中間，一直織到該半邊頭髮完全加入晒，之後於腦後中間位置續織一條三手辮至尾。另一邊如是。最後將兩條三手辮於後腦中間相鄰位置束上一條橡皮筋，不必將兩條三手辮拆去。