IKEA早餐

IKEA係一間瑞典公司，業務遍全球，以前喺香港，李太好鍾意去逛，因為樣樣都係簡單得嚟好靚，最鍾意呢隻簡約的幸福，曾幾何時有朋友兩公婆都係IKEA迷，新居就佈置到好似一個IKEA示範單位咁。美國呢邊都有IKEA，但定位同香港好唔同，呢邊IKEA = CHEAP，一般美國人覺得去IKEA係因為平，但唔等同好，試過同老公講去IKEA買小童床，因為又幾靚又平，橫豎小童床都係瞓得三兩年，唔駛買咁貴，老公都話好，但當佢問有小朋友嘅朋友，個個異口同聲話老公cheap，果D床點可以俾小朋友瞓，我心諗唔通個小朋友可以瞓爛張床咩，只要木質夠實，設計安全，就算瞓兩三年爛都OK，個仔到時都要換床啦，最後我地都係冇買到IKEA嘅小童床，豬扒妹同哥哥兩張兒童床都係二手，姑仔俾我地嘅，都大大話話瞓咗好幾年，咩都抵晒。

香港IKEA讀易KEY牙，美國讀艾KEY牙，初初真係唔多慣，呢度好多人去IKEA唔一定係買嘢，而係去食嘢，有咩咁好食？有架，最正係個瑞士肉丸加lingonberry醬同肉汁，次次同我細佬去都要食，而家一碟15粒要差不多$5，試過去食兒童餐好抵，幾蚊有個combo，有通粉或雞柳加果汁同生果。早餐選擇都唔少，今次我地係去咗Palo Alto果間食早餐，因為李生要買過一個laundry bag，呢個款用咗七八年，換第三個，都算係好耐用。

早餐選擇唔係好多，有French Toast加Syrup，其實係肉桂多士加糖漿，兩個小朋友鍾意沾糖漿，玩多過真係鍾意，但唔知係咪肚餓，每人食咗差不多兩塊麵包份量。早餐有焗薯仔粒，我覺得醎咗D；有幾片切得好似紙咁薄嘅bacon，唔算肥但真係薄到連bacon味都食唔出；仲有炒蛋。Big Breakfast大早晨就多一份French Toast，分咗部份俾對仔女食。另外叫咗斑戟個果醬，斑戟應該係麥粉做，所以唔係好滑，但沾果醬唔錯，但豬扒妹唔欣賞。

呢度環境好好，樓底高採天然光，檯椅都係天然色，有適合小朋友嘅圖案，有BB椅，全部自助形式，自己去揀食物，之後去俾錢，除樽裝飲品外，去到收銀會俾杯你去自己倒，加幾毫子有全日咖啡任飲，真係有人拎份報紙去睇，一路食一路飲一路嘆，全日未必，但半日一定唔少。

食完自己收拾，放去特定收集盤同架上面，定時有人去處理。今次個早餐一家四口，計埋兩枝飲品，大約$12，小朋友食得開心就無價啦。李生又買到佢想要果個洗衣籃，而家賣到$8，但都係算幾抵用。