素炒河粉 Stir-fried Ho Fun with Vegetables

因為李生覺得我之前炒嘅河粉好好食，但佢唔係好鍾意個牛肉，加上仔仔唔多食肉，於是李生提意用素菜炒河粉，不過今次李生好狼，居然要買兩包粉炒，上次一包都一餐食唔晒，今次足足有四大個午餐盒。原本諗住買白菜仔同炒，但昨日去到超市見到白菜仔唔多靚，所以冇買到，只係用屋企有嘅西芹芽菜同洋蔥炒就算啦。

材料：
河粉     2包
芽菜     半包
西芥     3瓣
洋蔥     2/3個
蒜頭     2粒
青蔥     1條

調味：
鹽          1茶匙
糖          1茶匙
生抽       2湯匙
老抽       2湯匙
麻油       1茶匙
美極醬油 1茶匙

做法：
1）河粉先續條撕開待用。

2）芽菜洗淨瀝乾水，洋蔥去頭去尾切片後撕開一條條。

3）西芹切成幼絲，蒜頭去衣拍幾下，青蔥切段。



4）先下少許油落鑊，爆一爆蒜頭，加入青蔥同洋蔥，炒至洋蔥略變色。
5）加入西芹、芽菜同炒至軟身，再加入河粉，以筷子拌勻。

6）混合調味料後加入鑊中，快手拌入河粉中，試味OK後可上碟。

小貼士：
1）素炒河粉嘅配料可以有好多變化，加入菜蔬例如各式青菜、木耳絲、紅蘿蔔等都係好選擇。今次我覺得西芹太少，西芹爽爽脆脆口感好好。
2）河粉一定要撕開一條條，呢樣唔懶得，唔係一落鑊就痴埋晒，用鑊鏟不易分開河粉，只會整斷晒。
3）河粉不用汆水過冷河，撕開一條條後最好放一個兜或筲箕中。如果驚唔乾淨，充其量用少許暖水沖一沖，放於筲箕中晾乾或抹乾。河粉洗水後會變軟，一炒就斷之餘仲會炒到痴埋一舊舊。
4）調味其實好隨意，如果覺得唔夠味或唔夠色，可以加多生抽或老抽。

後記：
仔仔話要食午餐肉，因為學校有同學帶spam musubi做午餐，佢覺得好得意，要求媽咪整，但因為我地買咗河粉，所以折衝辦法係將午餐肉切粒灑上粉面，只要仔仔肯食，午餐肉唔係十惡不赦，加上唔係成日食，做個小朋友喜歡嘅午餐盒係做媽咪嘅願望。