香茜炆腩肉

其實豬腩肉近呢一年我都成日炆，因為李生同李太爸都好鍾意食。今次呢塊豬肉係之前李太想焗燒肉買嘅，但因為個神經焗爐，今次燒肉又失敗，個爐成日自動降溫，只要低過400度就一定唔著，去到400度都冇用，一陣又自己熄，所以呢塊肉焗咗成個鐘都唔成功，一D都唔似焗咗咁耐，真係好心淡，但咁大塊點都唔好嘥，於是就諗咗用嚟炆，由於塊肉已經之前醃過煮過，我今次用少好多調味，怕塊肉出嚟太醎，以下所寫嘅調味份量係正常煮要加嘅。

材料： 
五花腩 2磅
芫茜    1大把
蒜頭    1個
蔥       3條

醃料：
鹽       1至2茶匙
胡椒粉 少許

調味： 
生抽    2湯匙
老抽    2湯匙
鹽       半茶匙
糖       1湯匙
花雕酒 1湯匙半
麻油    少許
水       適量

做法： 1）五花腩先以鹽同胡椒粉搽勻醃過夜，煮前半小時取出放室溫。
2）煮滾一煲水，將五花腩放入水中煮約10分鐘，瀝乾水份待涼，切成約兩吋X兩吋大，半吋至3/4吋厚肉塊。

3）蒜頭去頭去皮，蔥去頭切成蔥段，下油爆香。

4）放入五花腩肉略爆兩面，之後加入調味料，拌勻均勻，等每一片肉都沾到調味料，加入清水至蓋過肉面，較文火炆30分鐘，中間兩三次反轉肉塊，等肉塊均勻入味。

5）最後加入芫茜拌勻再多煮5-10分鐘。

小貼士： 
1）芫茜不宜過早加入，否則就會煮到爛晒。
2）花雕酒煮嘅過程已經蒸發，所以就算小朋友食都冇問題。
3）可以用片糖或冰糖代質普通糖，加入片糖或冰糖有助令肉質鬆軟，而且片糖會令肉色深D。
4）除咗芫茜之外，亦可改用羅勒（即九層塔），也可以加入魚露、八角、花椒等令味道天多變化。
後記：
次次整呢一個炆豬肉，唔駛兩餐就會食晒，尤其是李生更是超級粉絲，有佢包底一定好快食晒，不過李太都要提醒佢唔好食咁多肥肉部份，因為上咗年紀肥膩嘢只可以少食，不宜過量。