自家製醬汁：Pesto Sauce

Pesto Sauce最多應用於意粉食譜上，係眾多西式醬汁中最健康嘅，卡路里較其他受歡迎嘅Casear Dressing、Thousand Island或Ranch Dressing低，李太陀豬扒妹時因為有妊娠糖尿，有兩三個月時間要控制飲食，營養師幫李太訂定一個少糖食譜，當時一日六餐多食少量，加上選擇合適食材，好快血糖就受控制，當中一個大發現就係Pesto Sauce，所以於控制飲食時都可以大快朶頤，食其意粉通心麵。不過Pesto Sauce都幾貴，一小樽賣七八塊美金，煮到一餐幾個人份量咁大把，於是李太就搵整Pesto Sauce嘅方法，原來不難整，而且可以按口味變化，符合我鍾意多嘗試嘅原則。

材料： 新鮮蘿勒葉 約3至4棵(Basil leaves)

蒜頭      3粒
芝士碎   2-3大湯匙(Parmesan Cheese)
黑胡椒   1茶匙
鹽         半湯匙
橄欖油   適量（約3至4湯匙）

做法： 1）蘿勒只要葉嘅部份，莖部可以留低做燉肉調味。
2）蒜頭去皮去頂。
3）將所有材料放入攪拌機中打成蓉，橄欖油可先放一半，待所有材料略打再續少加入至合適濃稠度。

小貼士：
1）正宗Pesto Sauce會加入松子pine nuts，但如果有食物敏感可以唔駛加都可以。另外唔係個個都鍾意松子嘅口味，可以改用其他堅果類例如合桃、腰果、花生等，不過堅果類都有油份，唔加嘅話個醬汁熱量更低。
2）芝士份量都可以因應個人口味加減，Parmesan Cheese或水牛芝士會較適合，美式芝士藍芝士等味較濃就不太建議使用。
3）Pesto Sauce一般用於拌食意式粉麵，但用來沾蔬菜式豆類都適合。