材料：
生麵 1磅
芽菜 1/4磅
金菇 半包
薑 2片
蔥 1條
調味：
生抽 3湯匙
老抽 1湯匙半
麻油 1湯匙
魚露 1茶匙
做法：
1）先滾一煲水，將生麵放入略燙至軟身，撈起放入筲箕中，用凍水沖洗至麵涼，放一旁待用。
2）芽菜洗淨撈起瀝乾水，金菇切去尾部有泥部份，放中水洗淨撕開成一條條。
3）以少許油爆香油鑊，放芽菜炒至軟，再放金菇炒至軟身。4）將生麵放入鑊中跟料拌勻，將調味淋入，即以筷子將麵跟汁與料拌勻，當麵條上色，試味後灑上薑絲蔥絲就可以上碟。
小貼士：
1）生麵汆水切忌太久，否則麵條炒時會易斷易糊，撈起要即時以凍水沖涼，以手指將麵條抓開，以確定所有麵條都已涼。另外最好將麵條放一會至炒，等麵中水份瀝乾，炒時就不會水汪汪。
2）個人覺得不要用鑊剷炒，一對木筷子容易控制，又唔會將麵條炒斷。
3）易潔鑊炒方便又可以少油，就算用生鐵鑊炒，只要炒時先炒芽菜等料，加入麵條之後快手將調味加入炒勻就唔會黏鑊。
4）炒時要留意火力，不要太猛火將麵條炒燶。
5）今次買嘅係生雲吞麵，但覺得同生麵差不多，汆水唔覺有鹼水味，質感較似生麵。
6）豉油皇炒麵我用普通生抽炒，用少少魚露加鮮味，有人教用頭抽，但我一向以健康為先，家中調味以低鹽為首選。
7）可改用鮑魚汁或XO醬炒，會有另一種風味。
8）因為要遷就我兩個寶貝，我唔用薑蔥起鑊，改為最後將薑絲蔥絲灑麵上，方便我可以將薑蔥揀出。9）因為仔仔對海產有少許敏感，所以我冇用一般人會用嘅蠔油，改用魚露，但我都唔敢用太多份量，好彩仔仔食咗唔覺有問題。
後記：
在李太估計之中，仔仔好鍾意食，連續食咗5碗，雖然係小朋友膠碗，但份量同大人碗差不多，我冇將碗盛滿，但都有八分份量，到食完第5碗仔仔都話要添食，我有D滴汗，我話唔可以再食啦，睇佢個肚仔已經又脹又實，我驚會食壞肚，好彩仔仔都肯話唔食，不過晚飯後又食生果又食C，點解會咁擦得架？豬扒妹呢個麵怪今次食咗兩碗多D，都算正常。
No comments:
Post a Comment