簡單粟米有機菜沙律

因為仲有ranch dressing淨未用完，係呀，就係上次整果D啦，包好放雪櫃都可以用到好耐架。今次係見到有有機菜減價，買咗一大盒，不過，其實都係夠二人份，如果唔係減到好平都唔買，呢種有機雜菜好好食，最緊要新鮮有益，加埋新鮮粟米就一流。

材料：
有機雜菜   適量
粟米         1條
提子乾      3大湯匙
蕃茄         1大個
Ranch dressing 適量

做法：
1）有機雜菜洗淨瀝乾水（其實如果係真空包裝果種係唔駛洗），蕃茄洗淨去蒂，切成細瓣抹乾水。

2）新鮮粟米去衣去鬢開半，放大煲中，水浸過粟米面，煲至水滾，轉中文再滾15分鐘至粟米熟透。粟米由滾水中取出，以凍水沖洗一下，放涼後剝出粟米粒。

3）將菜、粟米粒、提子乾放入大兜中，加入適量ranch dressing拌勻，再將蕃茄排放在沙律面即成。

小貼士：
1）唔計較粟米是否完整一粒粒，可以用刀整片削下粟米粒，可以省去續粒剝下嘅時間。
2）提子乾有吊味作用，可以改用帶有少許酸味嘅紅苺乾，切成細粒嘅杏脯乾都可以。
3）大蕃茄可以改用細粒車厘茄，將車厘茄切半會較方便食用。