去九龍塘食糖水 Kowloon Tong Dessert Place

此九龍塘不同彼九龍塘，唔係喺香港，而係SF有間糖水店叫九龍塘。呢間糖水舖每日開下午5點，收半晚1點，星期五六晚仲開到兩點，好多年輕人一大班食完飯去飲嘢，呢度叫Clubbing，又有D收工夜嘅人去食宵夜。除咗好多甜品選擇外，呢度都有麵食類，好似餐蛋公仔麵、車仔麵等，小食有一類係港式小食，好似雞蛋仔、咖哩魚蛋、夾餅、糖不甩、豬腸粉等，糖水有傳統嘅豆腐花、芝麻糊、花生糊、燉蛋，又有新式D嘅雜果西米露、各款生果果汁底涼粉；西式嘅有雪糕、香蕉船等，另又有不同飲品，例如港式奶茶、果汁、冰類等。平日我地一家都好少出街食甜品，因為呢D甜品小食屋企都整到，價錢又唔便宜，不過耐不耐都會帶兩個小朋友飯後出街走走。今晚係同埋舅父仔一齊去，所以可以叫多少少嘢。

哥哥始終鍾情朱古力雪糕，查實$2.5兩球雪糕好貴呀，減價一大盒都係$4.99有排食。

豬扒妹上次試過就愛上糖不甩，佢真係可以自己食晒呢碟。

舅父仔叫咗雜果涼粉芒果汁底，叫做幾多生果。

李太叫咗個薑汁撞奶，但呢個有D失手，個奶唔係好熱，薑汁味好濃好辣，但撞得唔好，有D奶水分離，唔多杰身。

再嚟個小朋友至愛：雞蛋仔，即叫即整，新鮮熱辣，唔講得上一流，但都算有水準。

李生想嚟想去，最後叫咗個炸雞翼，三大隻雞全翼加薯條，真係即炸起，熱到出晒煙，味道好好肉又滑，呢個好抵食。

埋單連貼士$24，雖然價錢唔算平，但菜式大部份都好食，好彩唔係成日咁食。

九龍塘Kowloon Tong Dessert Cafe, 393 7th Avenue, San Francisco, CA 94118 (between Geary Blvd. & Clement Street) Tel: 415-876-1289,
Mon-Thu 5pm-1am, Fri 5pm-2am, Sat 3pm - 2am, Sun 3pm - 1am
泊車都算OK，唔介意行多兩步，Geary Blvd.都唔難搵車位。