Sunday, January 15, 2012

是日brunch:西洋菜豬肉雲吞 Wantons with watercress and minced pork

因為李生有事,所以今日又係一對二,通常咁嘅情況下,我多數都會只食一D簡單嘢,唔會攪咁多,因為唔想留低兩兄妹自己喺廳玩,有時唔睇住幾秒鐘就打交爭嘢,咩都可以爭一餐,又可以係鬥咀演變成打交,所以就算係去叮個麵包都要一「耳」關七,聽到有咩風吹草動就要1秒跑到現場,制止任何有可能會演變成打鬥嘅情況出現;不過呢朝早原先想一個人帶兩個出去食個早餐,但兩兄妹都話想喺屋企食,咁屋企又冇咩可以食,問佢地想食咩,答案係包包(咁啱冇,要整都可以當下午飯啦)、cereals(有少少,但唔夠兩個B食,而且哥哥唔多鍾意)、salami sandwiches(豬扒妹唔食)......於是我問不如食雲吞好嗎?好彩兩兄妹都話好,於是約法三章:要乖乖地入去廳玩,唔可以打交,媽咪整雲吞,唔好入去廚房睇,因為佢地冇嘢可以幫手。OK,deal。





材料:
碎豬肉 半磅(要有肥有瘦)
西洋菜 半磅
雲吞皮 約40張(要薄雲吞皮,放湯果隻)
1隻

調味:
1-1/2茶匙
豉油 2湯匙
麻油 1-1/2湯匙
白胡椒粉 1/4茶匙

做法:
1)西洋菜放水中,加入少許鹽,浸10分鐘後每條折開數段。
2)瀝乾水後切碎成細粒再剁碎,揸乾水份待用。



3)豬肉加入調味料拌勻加入西洋菜碎,打入雞蛋1隻拌勻,成為雲吞餡料。






4)每張雲吞皮放入約一茶匙餡料,以手指合攏雲吞皮,在餡料對上位置壓實,放入已掃油碟上。











5)水滾後放入雲吞,煮至雲吞浮面,另餡料對上瑰吞皮呈半透明即可撈起。


6)可加入菜湯或雞湯同食,又可以加入麵條成雲吞麵。

小貼士:
1)碎豬肉不宜用全瘦,否則製成後肉食落會乾。
2) 餡料不妨醃得醎一D,因為加入菜之後味道會淡咗,加得唔夠豉油,到時煮好會覺得冇味。
3)菜水份多,以菜做餡料一定要瀝乾水刴碎後再揸乾水,唔係完成後個餡會水汪汪,雲吞皮會好易穿,口感亦不佳。
4)煮雲吞可以齊凍水落煲,煮至滾就食得,但落煲之後要攪一攪個底,確保冇雲吞黏底,否則雲吞多數會穿。
5)因為已加蛋入餡料中,所以唔駛用蛋黃將雲吞收口。
6)雲吞最好即包即食新新鮮鮮,如果包完唔即食,可以蓋一塊濕布喺面保持個皮唔乾,放嘅碟要先掃一層薄薄油份,以免放得耐個皮黏住隻碟,若第二日食又包好就要一隻隻排好放入存氣盒中放雪櫃,如果想存放更耐時間建議放入密實袋中,放置冰箱內就可保鮮一兩個月。

後記:呢個份量包咗40隻,兩兄妹好俾面每人食咗5隻,豬扒妹仲係唔多駛催就食晒,李生返到屋企就煮咗個麵加入幾隻雲吞,唔夠10分鐘,成隻碗所有食得嘅都清晒。多謝李生同兩兄妹捧場,你地真係好鬼抵錫,李太煮大部份嘢都擦晒,等李太冇籍口偷懶啦。

1 comment:

  1. 有无特别方法易D将碎菜瀝乾?用布袋吗?
    [版主回覆01/21/2012 02:07:35]我有個Spinner,會先整乾咗D菜再切,都仲有水,我就用手續少搾乾,當然要洗乾淨隻手先啦,哈哈~正經嘅:1)切完可以用廚紙包住壓D水出嚟,又或者2)放入個碗裏面,用匙羹或湯殼壓D水出嚟,3)用煲湯袋扭仲正,包你乾。整雲吞或餃子呢D,如果加菜,一定要乾,唔係成個皮糊晒,一定唔好食又易穿。

    ReplyDelete