再嚟椰蓉檳 Coconut Buns again~

呢次係第三次整麵包啦，都係椰蓉檳，因為鍾意食囉，而且革命尚未成功，點可以又走去做第二種。今次大致上個麵團材料係一樣，不同我手搓咗好耐，加咗多D水，手搓耐D係想睇吓會唔會個質感更鬆更彈。


搓完個麵團係好光滑，睇唔到有筋，仲係幾濕幾黏手但又唔係去到成唔到一個麵團。

靜置30分鐘後個麵團發大咗好多。

放完氣摺幾次，又搓番做麵團，size縮番細，都比未發酵前大個。

再過30分鐘後，個麵團比第一次發酵更大，直情係頂住張保鮮紙。

切開4份，因為今次想整8個，切開見到個麵團裏面好鬆有窿仔，個麵團好軟但唔黏住手，果刻覺得成功在望啦。

另外個餡都加多咗糖同雲厘嗱香油，幾滴就聞到香味。

今次唔好係太貪心想多D餡，因為李生話冇咩味，所以今次加料，但包果陣就問題出玩，有部份黏得唔好，餡料多容易散。

好彩焗出嚟真係我想咁嘅鬆軟，因為個麵團較濕，而且今次整多咗兩個，D餡料初初係漏咗出嚟，焗完個樣唔多睇得出，好彩好彩。

見到又忍唔住襯新鮮試下，嘩，嘩，嘩，好鬆軟呀，係呢種感覺啦，我就係想要呢種，真係冇辜負我手搓咗咁耐，夜媽媽又整包。個餡好夠味，真係好似細個食果隻椰蓉檳咁味呀。

撕出嚟見到一絲絲架，個質地好鬆，之前切開麵團包餡果陣已見到個麵團有窿，仲係非常有彈性但又唔黏手。真係急不及待想李生聽朝起身試味，好心急，好心急。

美中不足係個焗盤好似細咗D，咁多個包好似逼到變晒型，下次要用個大嘅焗盤試下。

後記：李生終於試咗個包啦，佢話好好食呀，佢未食過呢隻港式麵包~
昨日去groceries shopping，李生話以後唔買麵包啦，有我整就得，吓？咁大壓力？唔整就冇麵包食喎!!!李生叫我整細細塊嘅方包，因為個仔次次食三文治都食唔晒一份，不如整細塊D嘅方包，就可以方便我地做午餐俾仔仔，李生真係一個好爸爸，抵錫。
OK，李太將會開始研究整麵包，到時再慢慢分享。