Gilroy Garden 一日遊之3

都有D攰啦，豬扒妹想坐摩天輪，排咗幾個字隊終於輪到我地啦，風景尚可，但豬扒妹因為個座位會前後擺動有D驚，死抓住我。

玩完摩天輪都好晏啦，個個都肚餓，但李生話出咗去食午餐就唔再返入去啦，所以玩埋想玩嘅就走啦，於是又再encore多一次個蘋果車，點知第二次個負責人話豬扒妹未夠高，唔可以自己坐，豬扒妹又想坐前面，但前面已經坐咗人，我唯有同豬扒妹坐中間嘅位，豬扒妹唔開心喊完仲發脾氣，

哥哥自己坐我地前面，自己玩得好開心。

玩完呢個我地就出去食個好晏嘅晏啦，我地自己準備咗三文治、生果等，因為唔帶得食物入園內，唯有將個放午餐嘅箱放車內，食時就出去食完再返入去，否則喺園內買食物真係貴到嘔，兩個雪糕已經$7，熱狗等更唔抵食，所以嚟過兩次都係自己帶食物食完再入去玩過，今次李生話唔想太晏走，橫豎個個機動遊戲都差不多。

食完上車回程，豬扒妹未夠5分鐘已經去咗搵周公子啦，

哥哥死撐但都已經攰到冇表情啦，後來都有瞓著；

李太中途都瞓咗一陣，辛苦晒李生做司機揸咁耐車來回。


後記：豬扒妹見到香蕉船話要玩，李生帶佢去排隊，我同哥哥喺呢一度等，點知唔夠5分鐘李生帶佢返轉頭，豬扒妹仲一路行一路喊，我問咩事，李生話因為有高度限制，豬扒妹未夠高冇得上去玩，哈哈，呢個女真係唔識死，心口一個勇字，香蕉船都夠膽玩，俾個服字佢。