焗牛Roasted Beef

因為之前將聖誕大餐post上網，有人問我想學點整焗牛，原先我都冇影低相，而家只有寫個食譜出嚟，下次整再影相詳細介紹。李生今次買咗塊有骨嘅牛肉，屬於rib-eye部份，因為老爺請客，雖然係貴少少，我地都想買塊好D嘅，好彩聖誕果排超市爭生意，好多減價，呢塊牛都唔算好貴，平日大大塊靚D嘅，咁大塊要成美金百蚊。

材料：
牛肉 1塊（呢次係8磅重有骨）

醃料：
蒜鹽 適量（睇塊牛幾大塊）
黑椒碎 適量（又係要睇塊牛幾大）
橄欖油 適量

醬汁材料：
雞湯或菜湯   半至1杯（睇吓焗完肉汁有幾多）

鹽 半茶匙
糖 1/4茶匙
生抽 1湯匙
芥末醬 1/4茶匙
碎胡椒 少許
Oregano 1/4茶匙

粟粉　　 1湯匙

水　　　 3湯匙

做法：
1）如果係雪牛要先解凍，呢塊有8磅，放雪櫃解凍都用咗一日。
2）在肉上均勻塗上蒜鹽黑椒碎，再淋上橄欖油，醃大概4小時。
3）牛肉放入錫紙盤中，焗爐預熱425度F，先焗15分鐘，將塊牛底面反轉再焗15分鐘。
4）再反轉後較細火到350度F繼續焗，每30分鐘將肉底面反轉一次，直至焗到合你想要嘅生熟程度。我地一家食慣medium well，所以較細火後焗咗個半鐘有多，中間切開係剛剛熟晒。如果你想食medium raw，大約較細火後1小時15分鐘都得架啦。
5）由焗爐拎出嚟，攤凍少少至切。

6）煮醬汁我係用番焗肉時流出嚟肉汁，加入雞湯或菜湯及其他乾調味料，煮滾之後加將粟粉加水開勻加入醬汁中，再滾至汁收杰就可以試味，食時熱辣辣醬汁淋上牛肉上面。

小貼士：
1）選牛肉部份都好重要，肉眼較軟易熟，有骨會較多肉汁，但焗嘅時間又會耐少少。
2）如果肉面開始太熟但肉中間未熟，可以用張錫紙蓋住肉面再焗。
3）切肉勿切太薄同唔好焗完即切，要略攤凍少許，唔係D肉太熱，一來好難切，二來好易切爛。
4）煮醬汁可以加入少許切碎薄荷，會幾吊味。有人會用紅酒代替雞湯或菜湯煮汁，但因為有小朋友食，我就冇加酒啦。