食brunch ＠M's Cafe

寫一篇年廿九去食brunch先，呢一間小餐館同李生李太好有淵源，事關呢度嘅老闆Joe同老闆娘Amy見証我地由拍拖到結婚到生仔，拍拖時我地兩個成日行完金門公園就嚟呢度食早餐，食完就行返屋企，天氣好係幾好嘅運動，李太大肚果陣我地都成日係咁當運動。李生求婚果朝都同李太嚟呢度食早餐，食完就返李太屋企（而家我地屋企）拎隻介指出嚟。Joe同Amy見住我地拍拖、結婚、生仔，見住我對仔女由BB到而家幾歲大，可以話係老朋友，而且佢地同我地又係鄰居，我地住嘅地方差兩條街咋。M's Cafe位於Inner Sunset，果度泊車都叫OK，我地通常都係一早去，所以一般都唔難搵位。

呢間餐廳仔位於條街中間，細細個門口，裏面座位唔多，大枱得兩張，二人四人枱就多D。睇裏面嘅佈置都知係舊式餐廳，就好似香港中環嘅冰室咁樣。

因為係新年，老闆兩公婆都係華人，所以都有少少新年裝飾。

雖然係華人，但所賣嘅係美式餐，不過有中國茶飲，雖然係茶包，但又幾好味，早一兩年係供應綠茶，但老闆娘話後來個供應商唔再入貨，佢要再搵過第二隻。

同好多美式餐廳一樣，呢度嘅早餐係全日供應，每日有一個特餐，李生呢個就係今日特餐啦，次次唔同架，睇下有咩食。。。有兩隻蛋（李生至愛sunny side up太陽蛋）兩條意式肉腸（中間切開）加hash brown，仲有兩片多士，誠為$5.XX，算係抵食。

呢個係早餐中最抵食最吸引嘅M's Special，個餐有蛋（我鍾意炒蛋）加煙肉或火腿或corn beef（推介corn beef，抵食又好味，係鹹咗DD），再加薯仔home-fried potatoes（我通常改hash brown，因為跟餐嘅薯仔係好多架，食唔晒），仲有pancakes或French toast（今次叫French toast），跟埋咖啡或茶，都係$6.XX，我通常食唔晒，打包又做一餐早餐啦。

另外有一個又係超抵嘅Breakfast Special，10點前平幾毫子，但10點後都係$3.XX，有D咩？有蛋、有pancakes、有煙肉或火腿或腸仔，腸仔我一定唔食，因為係好鹹嘅美式辣腸仔，煙肉OK，火腿比較啱我心水，不過兩兄妹鍾意煙肉，所以就order煙肉俾佢地食~

因為呢個餐冇嘢飲，另外叫咗熱朱古力，佢地想要whipped cream，呢度嘅熱朱古力冇cream，不過就熱辣辣又大大杯，兩兄妹最後都飲唔晒。

豬扒妹好緊張等食，爸爸唔該快手少少啦，人家肚餓啦。

今日都算乖，兩個自己食，雖然都要提佢地唔好掛住玩，但算係食得多，我估係因為肚餓。

咁多嘢我地一家都食唔晒，最後打包咗個French toast番屋企，埋單計埋貼士$23，算係幾抵食，星期日泊車唔駛入咪標，如果唔係落雨，同一個block有個farmer market，都有少少嘢睇，買花就最抵，今次因為落雨，我地食完出嚟都已經收晒，下次去過，不過farmer market嘅嘢都比較貴，話係因為天然喎，都唔知係唔係真。

M's Cafe地址係: 1376 9th Avenue（Irving同Judah中間）
開Mon、Thu至Sun 7:00am至4:00pm

P.S. M'Cafe 已於2013年初易手，新店食物出準欠佳，價錢更之前更貴，不吃也罷~