農曆新年系列之4：舞獅 Lion Dancing

以前都有講過，李生以前參加醒獅隊，玩咗廿幾三十年，休息咗八九年，兩三年前因為對仔女而復出，每年農曆新年期間佢地都會好多活動，除咗今年2月11日嘅農曆新年花車巡遊，連續兩個星期六都會去多華人商舖舞獅，為醒獅籌募經費，好多華人主理嘅商舖都好鍾意舞獅活動，因為好意頭，唔通有人問你舞獅嚟拜年，帶來吉利，會有話唔要唔好咩？甚至有D老外都好鍾意睇，剛過嘅星期六就係西岸醒獅隊嘅籌款日，李太因為趕帶豬扒妹去考校區嘅語言試，唔記得帶相機，呢日所有相都係用手機影嘅，當然冇相機咁清咁靚，但都算捉到當中精彩部份。

其中一個大商戶就係SF Toyota，估唔到成個Richmond區有四間Toyota店，全部屬於同一個老細，每年佢都會叫醒獅隊去表演。第一站就係Geary Blvd.上呢一間SF Toyota，首先放好炮仗先，

跟住開鑼鼓，就三隻獅子一齊開舞啦，紅白藍三色獅子煞是好看，當中舞獅有男有女。

點燃鞭炮，三獅齊拜，最後嘅大鞭炮爆完後，舞獅表演就結束，三隻「獅子」好有禮貌拜別。

之後出發去到Clement Street開始之後幾小時嘅舞獅活動，等人等briefing時，兩隻一紅一白獅子在路邊休息，哥哥豬扒妹雖然唔係第一次見獅子，但好有好奇心咁去摸去睇，佢地記得獅子可以貶眼開口，但此時兩隻獅子都冇反應。

開始啦，由師傅Tony帶領開行，路上有好多人圍觀同拍照，非常熱鬧。

首先在商店門口拜幾次先，之後獅子會圍住門框咬，之後進入店內又拜又舞一番，出嚟之後就你燃點鞭炮，再作拜揖幾次至完全整個過程。

又到另一間商店啦，呢次係一間洗衣店。

呢一間係一間Burmese餐館。

蟲草城蔘茸行。

華人超市。

鑼鼓係放喺車上跟住醒獅隊旁邊行車。

去到呢間髮型屋前，白色獅子同哥哥豬扒妹玩一下，俾咗個大頭我影。

要過馬路啦，全部人除低獅頭睇清楚至過。

嚟到太平圖書店。

另一間華人超市。

呢一間係美容院，門口有個坐輪椅小朋友，獅子姐姐特別走埋去同佢玩一陣，點知小妹妹好驚。

美容院老闆娘好認真，有晒魚雞生果，仲燒埋衣紙，迎接獅子嚟送福。

由於鑼鼓車慢駛影響到交通，所以事前要入紙警察部申請，仲特別有個警察跟住我地去指揮交通。

小男生唔驚仲有幸同紅白雙獅拍照。

去到美國銀行，有兩個門口，於是一邊一隻獅子入到行內拜年，再退出放鞭炮。

呢段路因為double parking嚴重，唔可以再有車慢駛，所以要由人手搬鑼鼓跟住獅子。

去到另一間銀行東亞銀行。

兩個小朋友已經叫肚餓啦，於是李太就帶哥哥同豬扒妹去飲茶先，等李生嚟會合。點知飲飲下茶，見到兩隻獅子上嚟拜年，茶客都好興奮，特別係小朋友同老人家，始終新正頭都係好講意頭。

等咗兩個鐘，我地三個已經飲飽食醉，但都未見李生踪影，於是李太埋單諗住返屋企，落到樓下見到隔離茶樓門口有隻船好靚，兩個小朋友要同隻船影相。

行下行下聽到鑼鼓聲，於是我地三個就跟聲尋人，去到4th Avenue，果然見到醒獅隊，

連老外餐館都鍾意醒獅表演。

又去另一間SF Toyota啦，表演完滿地鞭炮紙碎。

跟住又去第三間SF Toyota，呢個係李太哥哥豬扒妹跟住醒獅隊最後一站，

兩個B已經話攰要返屋企，李生就同醒獅隊繼續行程，舞到太陽下山。