Gilroy Garden 一日遊之2

玩完個轉得好快嘅咖啡杯之後，又係轉轉轉嘅士多啤梨，其實多數機動遊戲都係轉轉轉，所以哥哥又係照例話好驚唔玩，但一開動之後發覺又唔係好快喎，於是由捉實我之後到開始肯放手坐，不過都係有D驚，

反觀豬扒妹，真係天不怕地不怕，同爸爸坐士多啤梨，仲想企起身。

跟住去玩上一年哥哥玩到大叫大喊嘅旋轉木馬啦，哥哥去咗坐馬車，即係唔識郁唔係高高在上果種，影唔到佢嘅相，豬扒妹未入去已經揀咗呢隻，點解？因為有好多花，隻馬都好高，不過豬扒妹唔驚，仲好鬼開心，其實有一條皮帶綁住條腰都叫做有少少保護。可惜我冇睇清楚，原來呢隻係唔會上上落落架，一開始就發覺唔對路但已經太遲，豬扒妹問點解唔郁架？

之後唯有補飛玩多一次，坐過另一隻。

玩完木馬已經中午，天氣熱兩個小朋友都有D肚餓，買咗雪糕俾佢地食，好大杯軟雪糕，兩個都食唔切，李生李太要做back up，必要時出口幫食緊D，但哥哥都一手都係，冇計啦，食完洗手把啦，兩個食得津津有味。

中間見到行人道旁有好靚嘅小黃菊，仲有好大隻小蜜蜂。

之後去玩路軌老爺車，不過相機冇電換唔徹電，於是只得兩張相，仲要冇嘢睇嘅。

再去玩一個好簡單嘅蘋果蠶蟲車，其實只係一個團團轉嘅機動，但因為轉得唔快又唔高，哥哥唔驚，加上因為兩個小朋友可以自己坐最前，佢地特別開心。