迷你版提子鹹方包 Mini Salty Bread with Raisins

李生話想我整三文治果隻方包俾個仔食，我一直都喺度盤算住點整好。呢晚對仔女又好似往常咁晚餐後又話要食嘢，因為我地晚飯係約6點食，李生慣咗晚飯唔食得多，之後就會食D零食，對仔女都學咗佢D衰嘢，我規定太晚唔可以食糖份太高嘅嘢，呢晚因為下午仔仔去birthday party兩點幾食咗pizza，晚飯就唔食多，果陣肚餓我都預咗。我問對仔女想食咩，佢地居然話包包，我話OK啦，拎起個麵包袋想攞麵包俾佢地食，點知個女話："NO，我要食媽咪整果D包包，I want to help you make 包包"。但果陣整包仲要幫手對佢地實在太晚啦，於是我同豬扒妹講："媽咪整包包，但你要早D去瞓覺喎，唔係媽咪整唔到包包架"。哥哥："我要幫你整"。我話："唔得架，包包好難，你幫唔到手架，你食完呢塊包包，早D擦牙瞓，媽咪今晚整你聽日有得食，好唔好？"哥哥同豬扒妹好爽快答應，呢晚真係不費吹灰之力，兩個B喺9點前上床，李太就開始搓包啦。

呢個鹹方包salty bread，又叫枕頭包pillow bread，因為通常都係一大舊好似個枕頭咁，我自己好鍾意食一隻甜甜地有提子乾嘅，對仔女都鍾意食提子乾，於是就整咗呢個迷你版提子鹹方包，點解叫迷你? 因為我係用一個細焗盤做，塊方包係得正常方包一半咁大，適合我兩個大帝食。

材料：
高筋粉 1磅（16安士=448g）
糖 2安士（56g）
酵母 1.5茶匙（1/4安士=7g）
牛油 1.5安士（42g）
暖水 8安士(250ml)
牛奶 2安士（63ml）
鹽 3茶匙（1/3安士=9.5g）
提子乾 適量

做法：
1）酵母先以少許暖水同1半糖放一起拌勻，靜置10分鐘。
2）麵粉過篩，加入鹽及餘下糖份。
3）牛油切成小粒，以手揉入麵粉中成淡黃色麵包糠狀。
4）酵母略攪拌，加入麵粉中拌勻。倒入牛奶拌勻。
5）續少加入暖水，把麵粉揉成麵團，不必一定將所有水份都加晒入麵粉中，只要足夠令麵團濕潤就可以。
6）將麵團取出，以雙手揉搓至表面光滑無筋但不黏手。
7）把麵團搓成圓球置碗中，面蓋保鮮紙發酵30分鐘。
8）以手指插入麵糰中放氣，取出後摺幾次，再揉成麵糰，再以保鮮紙覆蓋，靜置30分鐘。
9）第二次發酵嘅麵團明顯比之前大，取出做型。

10）將麵團分割成8份，可以睇到麵團中間有好多窿仔，麵團本身好柔軟又有彈性。

11）把每一份以麵捧壓成長形，灑上提子，卷成一個圓桶狀。

12）焗盤先擦油，把麵團卷續個排入盤中，再靜置30分鐘。

13）焗爐預熱至350度F（180度C），麵糰於最後一次發酵後放入焗爐焗45分鐘即成。

14）置架上最少半小時再用刀切成塊。

小貼士：
1）以糖和暖水混合酵母可以令麵糰於揉搓時較易混合。
2）以較低溫較長時間去焗包，可以令味道更濃郁。
3）提子乾只宜混入麵糰中，不宜灑上包面，李太就係貪靚灑咗一D提子乾喺面，結果係45分鐘烘焗令到提子乾水份抽到乾晒，味道又苦又粉。
4）一定要等到個包涼咗至好用刀切，否則一來難切開，就算幾利嘅刀都好難切得直。
5）呢種直接法做嘅包最大問題係新鮮熱辣果陣好柔軟，但一隔咗夜就硬晒，只要用一張廚紙蓋住放入微波爐叮30秒就會軟番，李太媽甚至用個鑊蒸番熱食都好柔軟。
6）酵母份量要因應酵母是屬於新鮮酵母、乾酵母等而定，我用嘅係乾酵母，包裝上寫2 1/4茶匙加水就等於7g活Active dry yeast，所以一定要睇清楚你買嘅包裝上說明。

後記：第二朝李生又係有嘢做，李太叫哥哥豬扒妹起身，初初佢地唔肯掛住玩，後來李太話有包包食，起身擦牙洗面，唔知係唔係肚餓啦，佢地嘻嘻哈哈走去洗手間，之後哥哥食咗4塊麵包，豬扒妹食咗3塊，雖然係迷你版都唔講得少，下午茶時間又每人食咗2塊，結果佢地兩個食咗差不多3/4，估唔到鹹鹹地加提子乾佢地咁鍾意。OK，下次又再整過，哥哥已經應承，如果媽咪整包包俾佢帶午餐，佢會全部食晒。