農曆新年系列之2：傳統賀年油角

其實講整油角，李太好細個已經學識，大約係小學5年級啩，都唔記得好清楚，果陣李太住香港嘅屋村，係七幾年起有獨立廚房廁所果隻，一層樓有四十個單位，果陣鄰居都守望相助，平日都會打開門，行過門口都會寒喧幾句，大家嘅小朋友一齊大，上一樣嘅學校，有D成為好朋友，逢有好嘢食，大家都會分甘同味。由於當時大部份已婚女性都喺屋企一邊湊小朋友，一邊做外發，李太細個就幫李太媽整過絲花，車過睡衣，當時鄰居嘅太太（個個都叫師奶）事無大小，都會大家商量，小至點樣補衫，點樣煮餸，大至小朋友報邊間學校，老公失業等，大家都會講。李太當時年紀細，好多大人嘢我都唔識，李太媽唔會同我講，而家大咗講番，又係另一種體會，好懷念以前果種人情味濃嘅生活，唔似而家「各家自掃門前雪」嘅心態，對於以前嘅情同事，那些年嘅任何嘢都好似令人回味萬分。

講到油角（又叫角仔），李太媽係唔識整，亦都冇興趣整，因為工夫繁多，又花時間，但以前每年農曆新年我地屋企都會有油角，因為以前我媽同隔鄰嘅幾個太太都喜歡玩「交換禮物」，你蒸糕我炸油角，大家整完你拎D俾我，我拎D俾你，冇計較邊樣貴D邊個多D，就係咁樣分工合作，每年幾個家庭嘅賀年食品就樣樣俱全。李太媽每年只蒸糕，年糕、蘿蔔糕、芋頭糕，晚晚開始食晚飯就開始蒸，都要蒸幾晚，有時蒸到半夜三更。

有一年鄰家太太整油角，咁啱要人幫手，李太媽就派李太去，當日都唔知整咗幾多個鐘，只係不停手密密包，鄰居太太壓皮，佢細仔幫手印模，我就負責包，應該包咗幾百隻，原來係幾好玩，我又好有興趣睇住鄰居太太搓皮，當時係用豬油整，D豬油仲要係李太媽用豬肉自己炸俾鄰居太太用嘅，以前總覺得好神奇，個個媽媽都好似萬能咁，一對手又工作，又煮飯洗衫，縫補木工，無咩難倒佢地。而家注重健康，當然唔會用豬油，其實想用都難，今次我以牛油代豬油，炸出嚟冇用豬油咁酥，但出嚟都係脆嘅。




材料：（整到約30至40隻）
低筋粉   13安士（368克）
牛油      2安士（57克）
蛋         2隻
水         少許（約1湯匙）

餡料：
椰絲        3湯匙
白芝麻     3湯匙
糖           3湯匙
焗花生碎  3湯匙

油角皮做法：
1）低筋粉過篩，牛油熱溶加入粉中拌勻。
2）雞蛋略打，拌入粉中拌勻。
3）將粉搓成麵糰，若太乾續少加入水，至可以成糰為止，過程中麵糰若已乾濕合度，可以不必加入水。
4）麵糰放碗中靜置30分鐘。

餡料做法：
1）花生放預熱350度F（176度C）焗爐中焗15分鐘，之後取出以麵棍壓碎去衣，再以刀刴碎。

2）椰絲放易潔鑊中以中火略炒至香，放涼待用。

3）白芝麻以中火炒至香，放涼待用。

4）待椰絲、花生碎、白芝麻涼後，加入糖拌勻成餡料。

包油角程序：
1）將麵糰分成數份壓成薄麵皮，以杯或圓型模印出一塊塊油角皮。

2）將約1茶匙餡料放於油角皮中心位置。
3）皮下至上對摺，由兩邊開始壓實。

4）將整個油角皮邊緣部份以手指壓薄，通常都要來回壓幾次。

5）由一邊至另一邊以姆指由外向入面打側壓入再壓實，希望你明白我講咩，睇相會唔會好D？

6）如是者做晒成個邊緣部份，最後將皮收番去入面就完成。

7）放油入煲內，較至中火，放入油角炸至兩面都成為金黃色，撈起以吸油紙吸乾油份。

小心得：
1）做皮時未必一定要加水，要睇個皮係乾定濕，如果已足夠和成麵糰就唔駛加。
2）炒椰絲時唔可以大火，因為椰絲好易燶，如果鍾意食較香口嘅，就不妨炒至變成微黃色。



3）怕焗花生麻煩，可買現成嘅roasted peanuts再壓碎。
4）將油角皮以手指略為壓薄，做成少少兜型，可以方便包餡料，唔咁做都不大問題。
5）油角皮越薄，炸嘅時間就越短，但炸嘅過程中亦容易穿。
6）炸油角時建議以一個網罩或有孔湯殼放入油角先炸，炸至一面變成白色就可以反轉離罩/殼，每次唔好同事放太多（我鍾意用個細湯煲炸，一來所需油份會少D，二來又唔會咁易彈晒D油出嚟），方便可以每一隻去經常反轉同炸得均勻。

7）天氣凍油角放過夜就會油咗唔脆，可以焗爐較350度F（175度C）略為焗一焗就會脆番。儲存就要放入存氣盒內，可以放到一兩個星期。