Saturday, January 7, 2012

沒有李生的生日晚餐

好唔好彩,李太生日果日,李生要去送殯,佢好鬼緊張問我佢可唔可以去,因為要送果個係李生由細玩大朋友嘅媽媽,就係之前三藩市Cable Car遊記裏面揸cable car果位Uncle T。李太媽話係李太正日,仲要送埋上山食解穢果隻,可以唔去就唔去啦,都唔係話迷信,但生日正日真係唔係幾老嚟,之前次次呢D場合我地兩公婆都會拍拖更一齊去,但今次我決定唔去,李生當日請咗半日假,因為個儀式喺下午一點,食飯就之後五點。

到咗我生日,未夠鐘去殯儀館之前李生去Whole Foods買咗個蛋糕返屋企,因為上次62生日姑仔買果個好食,李生千叮萬囑我阿媽要點做,果陣我媽至記起係我生日,即刻去拎隻雞出嚟整,去街市買魚買燒肉,如果唔係果晚會冇好餸食。最好笑係李生同我媽係雞同鴨講,李生中文勁C,李太媽英文有限過有限公司,我媽講番出嚟笑死我。

當晚都有幾多好餸




一定有嘅雞。



媽媽話緊要過隻雞嘅魚,因為有魚有餘嘛,唔知係叫咩班。



李太爸買番嚟嘅燒肉,皮就麻麻地脆,不過肉唔太乾。



菜有兩碟,一碟西芹雜菜,另一碟粉絲椰菜炒火腿。



仲有李太之前果晚自己炆嘅五花肉。



得我地4個大人2個小朋友,咁嘅菜真係太奢侈啦。好啦,去到切蛋糕果陣,我媽話有個曲奇餅係李生俾我,仲有個好巨嘅蛋糕,我一睇,原來個曲奇餅係用朱古力寫咗Happy Birthday加我個名,因為個蛋糕係黑森林蛋糕,上面有好朱古力碎同櫻桃,冇位寫字,所以就寫喺個曲奇餅上面放上去朱古力面。果刻我真係覺得好好笑,一個6呎高大隻佬原來都可以咁細心,結婚就7年,年年生日李生都記得,都有大大小小驚喜,有時連我自己都唔記得,佢就一早安排晒,不過有幾次俾我媽同我細佬唔覺意踢爆,好好笑。



雖然李
當晚冇同我食晚飯,但有對仔女都好夠,佢兩個知道係媽咪生日好開心,又唱歌又抱,甜到漏。睇佢地對我蛋糕幾有興趣,唱完生日歌準備切蛋糕,哥哥係幾乎痴實個蛋糕,都唔知點解食完飯都可以食得落蛋糕,仲可以食得好快。













首先將個曲奇餅分俾兩個B,應該係幾好味,





之後係一人一碟蛋糕,已經唔敢俾太大塊,明知最後一定係李太執手尾,李太果然料事如神。

見李生咁抵錫,李太就整咗個沙律俾李生做第二日午餐,有菠菜、雞胸肉同蘋果,加咗一個鼓油麻油汁,李生第二日食完話幾特別幾好味。



No comments:

Post a Comment