椰蓉檳出爐啦 Coconut Buns

昨日下午整咗pizza dough同椰蓉檳，可能係第一次整，手勢唔好，所以出爐個dough同個包都好似唔係幾發大，又好似唔夠鬆軟，又好似焗好耐都唔熟，總之就係唔係幾妥，諗嚟諗去唔知邊度出錯，最後迷底終於喺執相時解開：咦，原來果包酵母係7g唔係21g，我唔知個packaging攪咩，可能係一pack三包買，每包7g，個包裝寫咗總共21g，好彩有影低相，唔係就死得不明不白。

今晚再死心不息再試過，落晒成包酵母，又上youtube搵教手搓麵包嘅片睇，咁啱見到一個係麵包師傅教學生整包示範搓粉團手勢，原來要好大力搓到個粉團表面光滑出晒筋但唔黏手，於是就開工整，出嚟呢個包真係似樣啦，鬆軟有味，昨日仲有一個錯處係冇較到餡料嘅味，今次呢個冇出面賣嘅咁甜，但絕對係可以講好味。

麵包材料：
高筋粉         16安士（448克）
糖 4安士（112克）
酵母 1/4安士（7克）
牛油 1.5安士（42克）
暖水 6安士（188ml）
蛋 1隻
牛奶 2安士（56克）

包餡材料：
椰絲 3安士（84克）
牛油坐溶 1.5安士（42克）
糖 2安士（56克）
雞蛋 1/4隻（留少少掃包面用）

做法：
1）高筋粉過篩，加入酵母、糖拌勻。
2）牛油坐溶或放微波爐中叮溶，但不用太熱，加入粉中。
3）蛋略打加入牛奶中，例入粉中。
4）續少加入暖水，將麵粉搓成麵團，最好唔好一次加晒所有水份，如麵團太濕就要加粉，太乾可加水，粉團初初會好黏手。
5）把麵團放枱上搓至起筋有彈性，光滑但不黏手為準。
6）搓好麵團放盤中，用保鮮紙蓋上，發酵30分鐘。
7）將麵團放氣，摺拍數下，再揉成光滑麵團，續發酵30分鐘。

8）將所有餡料材料撈勻。
9）將發酵好嘅麵團分成3份，每份以麵捧壓平成長條型，鋪上1/3份椰絲餡料，捲成長形，中間切開成兩份，放入已塗油之麵包模中再發酵30分鐘。

10）焗爐預熱350度F(180度C)，包面塗上少許蛋液，放入焗爐中焗約20分鐘或至包全熟包面呈金黃色。出爐後可即時塗上牛油或果醬。

小心得：
1）椰絲餡要夠多，但切勿加太多糖，另外椰絲可因應喜好用有甜味或原味，我全家都怕甜，所以我著量減少糖份量。
2）搓麵團時不要一次加晒暖水，我係續少加，到麵團開始黏手時就拎出嚟用手搓，之後用手指將水份拍上麵團上面再搓，可以避免水份太多，因為水份都要睇濕度同天氣去調較。
3）一般做法都會焗好後塗上牛油或果醬增加味道同色澤，果醬以黃梅醬Apricot jam最夾味，我屋企咁啱得士多啤梨果醬，都蠻不錯。
4）要預留位置俾個包發大，我個長方形烔盤太細，所以我用一個圓形焗盤做成6個，其實呢個份量係4個正常size椰蓉檳，我就對仔女同個焗盤，所以分成3份，切成6個包。

後記：第二次整終於見得人，食得落肚，夠膽講好味，個texture好鬆軟，我試味撕咗少少，之後忍唔住夜媽媽食咗一個，想唔變肥C9都好難。

今日帶咗兩個包返公司當午餐，初初摸落好似個包隔咗一夜硬咗好多咁，但我放入微波爐搵張紙蓋住叮咗30秒，出到嚟軟熟同鬆番，仲好好味，我估如果噴少少水放入焗爐焗一陣，應該會仲正。李生返緊工等同事中途打俾我，同我講個椰蓉檳好食過之前果一次好多，但佢話都仲係未夠鬆（我都覺，或者要鑽研下搓麵團手勢），同埋都係未夠味道，我話要加多少少糖同椰絲，或者再加多少少雲喱拿香油，烹飪嘅世界真係好玩又博大精深，話之你係皇帝，整得唔好就係唔好，努力至會有成果，人人平等，我鍾意。