農曆新年系列之3：童年往事，蒸蘿蔔糕

上一篇講到李太細個住屋村，李太媽同一眾師奶會交換賀年食品，李太媽每年會整嘅包括蒸蘿蔔糕，而呢個就係李太嘅童年陰影，因為每年幫媽媽磨蘿蔔唔係十斤八斤咁少，而係幾十斤咁計，每一底糕用5斤蘿蔔，咁整得四五底大家都心裏有數啦，李太係由朝磨到黑，有時唔係磨一日半日，而係兩三日，因為李太媽一晚只可以最多蒸到兩三底，要整埋俾鄰居幾位太太，新年前嘅日子真係忙到不得了。李太大大話話有六七年冇蒸過蘿蔔糕，因為自從來美後，結婚生對寶貝係好似排隊咁一年接一年，前幾年對仔女細時根本冇時間可以做呢D嘢，而且美國呢邊農曆新年唔係假期，唔會有歲晚收爐或初四開工呢D歌仔唱。今年因為哥哥入小學，老師講解農曆新年，我想開始教多D有關中國文化習俗知識俾佢，哥哥鍾意食嘢，由食物埋手就最好啦。

材料：
蘿蔔 3磅
粘米粉 12安士
臘腸 1條
臘肉 1條
蝦米 2湯匙
冬菇 5至6隻

做法：
1）蘿蔔洗淨去皮磨蓉，留低磨蘿蔔時出嘅水待用。

2）臘腸同臘肉切成細粒，蝦米冬菇浸軟後切細粒。

3）將臘肉先爆香，加入臘腸炒一陣，再加入蝦米同冬菇粒同炒，至臘肉臘腸脂肪部份呈透明，冬菇蝦米軟身就撈起放涼待用。

4）蘿蔔蓉放入凍鑊中開中火炒至差不多熟，放入2/3之前炒好嘅臘肉臘腸粒等拌勻，蘿蔔會出水，煮好時將水份倒出留用，蘿蔔蓉放一邊待涼。

5）粘米粉以約8安士蘿蔔水混和至粉全溶解成粉漿。
6）蘿蔔蓉完全放涼後，加入粘米粉漿勻和。

7）將蘿蔔蓉粉漿倒入一個已掃油之糕盤中，撒上剩餘的臘肉臘腸冬菇蝦米粒排上粉漿面。

8）燒滾1鑊水，放入糕盤以大火隔水蒸約1小時，只要插入一隻筷子再抽出時冇粉漿黏住就可以收火。

小貼士：
1）中間我完全冇加調味，所有味道都係材料原味，根本蝦米臘腸臘肉都已有鹹味，加入鹽會好容易過鹹。但如果你想個蘿蔔糕冇咁淡，可以喺煮蘿蔔蓉時加入少少鹽。我因為通常食果陣會加調味，而且唔想對仔女食咁濃味，所以蒸糕時就原汁原味。
2）蒸糕用大火蒸1小時，除非你個鑊好大，裝到好多水，否則中途一定要加水，加水要加滾水，否則溫度降低會影響個糕嘅質地。
3）開粉不用另加水，可以加入磨蘿蔔時出嘅水、煮蘿蔔時出嘅水或浸蝦米冬菇嘅水，比用開水更有風味。但如果用浸冬菇水或蝦米水，因為有色，個糕會冇咁白。
4）蘿蔔糕蒸好，最好靜置1小時至切，唔係太軟好難切得靚。
5）材料可以跟口味加減，有人會用瑤柱、蔥、瘦肉，但大前提係蒸之前要炒熟材料。
6）先炒臘肉會出油，之後加埋臘腸，到粉蝦米冬菇時就根本唔駛用油。
7）煮蘿蔔蓉時一定唔好燒熱鑊先，要凍鑊倒入蘿蔔蓉煮熱，否則蘿蔔會苦。
8）蘿蔔蓉加入其餘材料煮好後，一定要放涼後至可以混入粉漿中，唔係粉會好結埋一舊舊，食時口感就唔好。
9）李太媽呢個份量係5份蘿蔔1份粉，有人鍾意多D蘿蔔可加至6份、7份，另外，若鍾意有咬口可以唔磨蓉，改為切細條或細粒。