自家製麵條 Homemade Noodles

買咗部pasta maker已經一個月都未開鋒，仔仔放咗兩個星期假，第二日要返學啦，又要每晚整第二日午餐俾佢，一向都係李生本多，因為哥哥係半個鬼仔，鬼咩，李生都係大半個鬼仔，除咗個樣係中國人之外，食嘢行為個性根本就係鬼。如果你問哥哥想食咩，佢一定話pizza、hotdog、salami sandwiches，豬扒妹至愛係麵麵、紅豆包，真係兩個小朋友同一個阿媽阿爸養，點解會相差咁遠？我想不如攞部pasta maker出嚟玩吓啦，佢地又有得玩（李生有嘢做，唔想兩個小朋友纏住佢），第二日又有得食。其實都好容易做，材料又簡單。

材料：
麵粉     2杯（16安士）我用中筋粉
鹽 半茶匙
水 4安士（120ml）我用咗之前浸冬菇嘅水

做法：
1）麵粉過篩加入鹽。
佢地襯熱鬧，點都要各自同D粉影相，仔仔做放粉入篩果個，李太同豬扒妹篩粉。

2）水慢慢加入麵粉中和勻，如果麵團已夠濕，不必加晒咁多水。

3）拌勻麵團之後用手搓，搓嘅方法係由一邊將麵團拉向另一邊，再用手掌略為壓一壓，再由另一位置將麵團拉向對面，如此類推，約搓5分鐘，再將麵團揉成一個圚麵團。

呢張相係李太搓粉，哥哥揸機影架，好彩有佢咋，唔係影唔到點搓。

表面仲係幾粗糙吓

嗱，兩個炸両又嚟湊熱鬧影相啦，係要一人捧住一次。

4）放入大碗中，蓋上保鮮紙，靜待約1小時。
5）用手以之前方法再搓麵團約5至10分鐘，至麵團表面光滑。

6）麵團靜置20分鐘。
7）用麵捧將麵團壓成薄長條，切成長小塊，放入pasta maker壓成薄麵皮。呢部機算幾易用，基本上哥哥都整到，最初果兩堆係哥哥整架。

8）之後用切麵器部份將麵團切成麵條，灑上麵粉令麵條不會黏在一起。

9）放入滾水中約10分鐘就會熟，可以撈起放入湯中食用。

小貼士：
1）將麵團放入pasta maker時，起得先灑上麵粉於表面，可以防止麵條太黏。
2）切好嘅麵條要灑上麵粉，分成一堆堆，方便之後落滾水中煮熟。
3）我用浸冬菇水去和麵粉，完成嘅麵條有淡淡冬菇味，可以加入菜湯或高湯或菠菜汁和麵粉做出不同口味。
4）煮麵條時因為之前加入麵粉防止麵條黏在一起，煮麵前要先拍去多餘麵粉，否則煮麵水會變得好杰好濁。
5）如果冇pasta maker，可以將麵團壓薄後卷起用刀切成麵條。

後記：
煮完麵條之後，兩個仔女話肚餓，於是兩個擦咗一滿碗。之後第二朝，我用富貴雞個雞汁再番煮麵條，麵條吸晒汁之後，非常好吃，加入少許菜同冬菇，哥哥好俾面食咗一半，放學之後再食埋剩低果一半麵條，都算對李太有交待，可惜朝早整午餐時時間太趕，冇影低哥哥個飯盒，睇唔到個雞汁麵條有幾好樣。最辛苦唔係搓麵或切麵，而係要清潔果部PM，因為唔可以放落水度浸洗，李太單手捧住個切麵頭，果部份好鬼重架，另一隻手好小心咁用刀仔將夾喺中間嘅麵團挑出，做完真係攰到冇朋友，下次都係整烏冬，用刀就咁切粗粗條算啦，今日對手臂都唔係我自己架。